JESUH KHRIH VANCUNG A KAI NAK

Ascension (Aasensin) timi biafang cu Jesuh Khrih Vancung a kainak kha a chim duh mi a si. Khrih timi biafang cu Hebru holh “Messiah” timi min kha Greek holh (Khristós) (Χριστός) in an leh mi a si. “Messiah” timi biafang cu Jesuh Khrih kha a sawh duh mi a si i Pathian nih fehter mi min a si. Cun Messiah timi biafang cu Biakam thar (Bible thar) cauk ah voi (514) ah langhter a si. Cu biafang nih Jesuh Khrih cu a miphun hna caah Profet, Siangbawi, Siangpahrang tiin khamhnak riantuan khawhnak caah sathau (chiti) thuh a si, tiah a chim duhnak a si.

Lamkaltu; 17:3 ah, “Messiah cu thihnak a in awk le a thawhthan awk a sinak kong kha cathiang chungah cun a langhter i a fainter. Paul nih cun a thawh hna i, “Hi kan chimh mi hna hi Messiah cu a si,” tiah a ti hna. Lamkaltu 18:5; “Silas le Timote kha Masidonia ram in an rak phanh tikah Paul nih a caan vialte kha a dih lak in phung chimnak ah a hman i Jesuh cu Messiah kha a si ti kha Judah mi hna sin ah khan a chimh lengmang hna.” (Matthai 22:42) “Messiah kong hi zeitindah nan ruah? Aho hrinsor dah a si?” tiah a hal hna. Annih nih “David hrinsor a si,” tiah an leh. Amah cu Messiah bawi tiah (Isaiah 61:1) le (Daniel 9:24-26) ah an tahchunhnak. (Isaiah 61:1) “Bawipa Pathian nih thlarau in a ka khahter, sifak mi hna sinah thawngtha phorh awk le lung a kuai mi hna damter awk le sal i a tangmi hna sinah luatnak thanh awkah a ka thim i a ka thlah.”

(Daniel 9:24-26) “Na mi hna le nan khua thiang caah zarh sawmsarih kha chiah a si; khi hnu ah ral dohnak kha a dong lai; sualnak kha a dih lai; that lonak kha ngaihthiam a si lai i zungzal dinnak kha runtlunter a si lai, langhnak le Profet biachimnak kha a tling lai i Hmun Thiang Bik cu chiti thuh a si lai. Cucaah hihi thei law hngal tuah; Jerusalem cu hmasa a si ning ah khan dihter than a si lai i sak a si than lai ti bia a chuah ri in Pathian chiti thuh mi bawi a chuah tiangah, zarh sarih a rau lai; cun zarh sawmruk le zarh hnih chung cu hmasa a sining ah khan siter than a si lai i a khuachung lam hna le ti laknak kahcham hna cu remh than an si lai; zarh sawmruk le zarh hnih a dongh tikah cun chiti thuh mi cu a hohmanh a hmun rolhtu um loin thah a si lai. A hun namtu bawi i a ralkapbu hna nih cun khuachung le Biakinn cu an hrawh hna lai. Donghnak cu tilian bantukin a ra lai i a hohmanh luatkhawh lomi ral dohnak rawhralnak a si lai.”

Messiah cu nu tefa (Gen;3:15), Abraham tefa (Gen;22:18), Moses bantuk Profet; (Deut;18:15), Melkhizedek bangin tlangbawi, (Salm;110:4), Jesse ciruang (Isaiah;11:1), Immnuel, Ngaknu thiang i fapa, (Isaiah;7:14), Biakamnak Lamkatu, (Malkhi; 3:1) a si.