Vawlei Ka Tei Cang

“Nannih nih keimah he nan i pehnak thawngin lungdaihnak nan hmuh nakhnga, hihi kan chimh hna. Vawlei nih hin harnak an pek hna lai, sihmanhsehlaw ttih hlah u. vawlei cu ka tei cang”.(John 16:33)
Bawipa nih a hnu zultu hna sinah “Daihnak” kong he pehtlai in zeidah a chimh hna hnga?

A hnu zultu hna sin ah Bawipa nih bia a chimh leng mang mi hna cu “Ral thatnak” le vawlei nih an cungah a tlunh te hnga ding mi thinphan thlalau nak hna kha tei khawhnak thazang ngeih ding hi a si(John 16:29-33).

Hi biachimnak vialte hna kan zoh tikah, abikin a langhter duh mi cu Bawipa Jesuh he kan i pehtlaih ah cun Pa Pathian he kan i pehtlaih a si ve i, kan chungah nunnak a um tinak a si. Nunnak um timi cu teinak a um ruangah a si. Bawipa nih amah he i pehtlaih dingin a kan fial bantukin, Amah he kan i peh chung paoh cu kan nung zungzal ko hna lai(John 15: 1-8). Cu ve bantukin kan nih hna zong pakhat le pakhat dawtnak in kan i pehtlaih ve a hau. Kan i pehtlaih ti lo a si ah cun kan nun ti lo caah, tan i hlonh kan si ko lai.

Bawipa nih a cawnpiak mi vialte hna hi a hnu zultu hna nih thei dih kho rih lai lo(Jon 16:12). Sihmanhsehlaw, bawmtu Thiang Thlarau a rungtum tikah cun Bawipa nih a cawnpiak mi vialte hna hi an thieh dih te lai. Bawipa lei ah a ttang mi hna le thil-dik, thil-hman a tuah mi hna cu vawlei nih a doh zungzal ko hna lai. Vawlei tiah Bible cathiang nih a timi hi Pathian “Biatak”a raltu hna kha an si.

Bawipa nih a pek hnga ding mi laksawng cu “thil-dik, thil-hman cohlaan khawhnak le le Bawipa cungah”zumhfek tein um khawhnak “ralthatnak” kha a si. Hi zumhnak cungah a um mi vialte hna nih an ton hnga ding mi cu, hremnak, thahnak harsatnak a phunphun zong a si kho. Pathian nawlbia pahra, bianabia ah“Lai va nawng hlah”(Exodus 20) timi Pathian bia hi vawlei hram thawh in vawlei dongh tiang a hman zungzal mi bia a si. Zeicah kan ti a si ah cun “Nunnak” cu Pathian sin in a ra mi a si caah a si.