Pathian tinhpiak mi

Vawlei cungah na sunparnak cu ka langhter cang; na ka fialmi rian cu ka lim cang. Cucaah Ka Pa, vaweli ser hlan i nangmah sin i ka rak ngeihmi sunparnak kha, atu ah hin na hmaika ah sunparnak ka pe tuah. (John 17:4-5)

Loyola khua in mithiang Ignatius nih a nun lam caah aa thleih mi biatlang hna cu: “Minung hi a thlarau khamh a si khawh nak hnga ding caah a tuah hnga ding mi hna cu: Pathian ttihzah awk, thangtthat awk le a rian thiang ttuan dingah hi a si. cucu Pathian nih a kan ser hnawh channak zong a si” tiah a ti. Chimduhmi cu a zeilei paoh in Pathian thangtthat khawhnak ding lam kawl zungzal hmasat “Pathian kha kan nunnak ah pakhat nak ah chiah ding” hnu lawngah mah thlarau caah tinhnak ngeih ding timi a si. “Cucaah zei dang vialte nakin Pathian Pennak le zeidah tuah hna seh ti a kan duh timi kha biapi deuh in ruat u law thil dang vialte hna zong hi an pek thiamthiam ko hna lai.”(Matt 6:33)

1/Bawipa Pathian nih kan caah tinhnak ttha a kan ngeih piak zungzal ko. Sihmanhsehlaw, kha a kan timhpiak mi hna kha a zoh zia le a hmuh zia tu kan thiam hna a hau. A kan tinh piak mi lam hna kha kan hmuh thiam lo a si ah cun, sual palhnak nih kan thlarau mit a kan phenh a si ah cun Pathian duhnak kha tuah khawh le tlinh khawh nak hnga ding lam a um kho lai lo. Pathian duhnak kha kan duhnak nganbik ah kan chia kho cio hna maw?

2/Nifatin kan nunnak ah Pathian nih a kan tinh piak mi le a kan duh piak mi hna kha kan zulh a si ah cun A duhnak kha kan tuah khawh ko lai. A caan ah cun Pathian duhnak kan tuah lai tiah lungthin nih a duh ko nain taksa nih a tei lo nak caan zong a um ko lai. Mithiang Paul nih: “Ka tuahmi hi a sullam ka hngal kho hna lo, zeicahtiah tuah ka duhmi kha ka tuah hna lo I tuah ka duh lomi tu kha ka tuah hna tiah a ti”(Rom 7:15 ). Sihmahsehlaw, Pathian duh nak kha hmuitinh in kan tuah a si ah cun teinak cu kan hmuh hrimhrim ko lai.

3/Nifatin Pa Pathian duhnak kan zulh, kan tuah a si ah cun kan nunnak hrimhrim in Pathian kha kan thangtthat a si i Pathian zong nih a sunpar nak chungah luh ding in a kan cohlaan ko lai. Pathian sunpar nak chungah kan um a si ah cun Pathian nunnak hrimhrim kan chungah a um lai i Pathian lunglawmhnak le hnangamnak cu hrawmh kan si ve ko lai.

Cu a si caah kan Bawipa Jesuh Khrih nih Pa Pathian duhnak vialte a nunnak in a tuah, a langhter bangin minung a si mi kan nih hna zong nih Jesuh a minung sinak in Pathian duhnak a tuah mi kha i cawn zungzal hna u sih law i nunpi zungzal ve hna u sih.