Pathian Bia cu Hmual a ngei (Heb 4:12)

“Cucaah ralring tein um ko u, mitthli he chun zan in kum thum chung nan dihlak in kan cawnpiak hna kha philh hlah u”(Acts 20:31).

Hlaan kan pipu hna cu Pathian thawngtha bia a rak phurtu hna nih Bible thiang in an rak cawnpiak hna i lawki nunphung in Khrihfa nunphung ah an lung an rak i thleng hna. Pathian ni (Zarhpi ni) ah siseh, pumhnak caan an hman caan paoh ah Siangbawi, Pastor te le cawnpiaktu hna nih an rak cawnpiak mi hna Pathian bia kha lungsau tein an rak ngai hna. Cuticun Pathian ni thiang kha an rak hman hna i an rak lawmh hna.

Duhsah tein vawlei thil sining a hun thangcho ciammam i Pathian bia cawnpiak ning cang hna zong duhsah tein a hung i thleng cuahmah ve. Khua khat le khua khat, ram khat le ram khat um kal ning cang a hun fawi deuh tikah Laimi tampi cu ram dang lei ah phanh khawh cio a hung si than. Cutikah an phanh khawhnak ram i an hmuh mi thil hna le nunzia hna kha duh sah tein kan Lai tlang ah hin an hun phorh cio hna. Taksa lei in thanchonak tampi cu a hung um taktak ko. Sihmanhsehlaw, thlarau lei in kan thanchonak hi zeitluk khi dah a si ve hnga?

Thanchonak ding caah caan hi upat le hman thiam dingin heh tiah i cawnpiak a hung si. Pumh caan zongah caan upat ding tiang in ralrin i pek a hung si. Phung chimnak caan a sau deuh tikah kan um thiam ti hna lo. Phung chimtu pa kha, midang zawn a ruat thiam lo sining in hmuh a hung si. Cutikah Pathian bia kan chungah a lut mi a zor chin leng mang. Vawlei lei kap in chim le rel a si ah cun caan a dih hmanh khi kan theih manh hna lo. Vawlei sining lei ah kan thinlung biatak tein kan hnim tikah duhsah tein thlarau lei in kan tlau chin leng mang cang hna.

Hlaan Khrihfa hna nunzia le dirhmun, an rak i cawnpiak hna ning kan zoh tikah tu chan kan sining he cun van le vawlei bangin aa thlau cang. Bawipa hnu zultu hna nih mipi sin ah cawnpiak nak an tuah tikah tha bat hngallo in chun he zan he an rak cawnpiak hna. Zumtu hna zong nih zultu hna cawnpiak mi vialte kha ttha tein a rak cohlaan ve hna tikah Khrihfa bu nikhat hnu nikhat in an rak karh.

Nihin kan bu chung ah hin teh zeitlukin dah cawnpiak nak lei ah thazang kan chuah cio hna i bupi chungah zeizat dah a hung lut mi dah an um? Pathian bia ngaih nak caan kan pek khawh lo tikah vawlei cung hmunhma kip ah, hlengtu Satan nih buaibainak a hung chuakter cang. Pathian cawnpiak mi ngaih duh loin mah thazang le thil ti khawhnak cung lawng ah kan lungthin kan chiah tikah tlaknak lei kap tu kan panh cang hna.
Dawtmi u le nau hna hlaan chan Khrihfa hna bangin Pathian bia le a kan cawnpiak mi hna cungah hin kan lungthin mer tthan in chiah khawh tthan i cio hna u sih. Pathian bia ah hin thazang i lak zungzal hna u sih.
“Kum hnih chung Paul cu khika ah inn aa hlan i a um; amah chawnhbiak awkah a rami vialte kha a rak lawmh hna. Pathian Pennak kong kha a cawnpiak hna i raltha ngai le zeihmanh dawntu um loin a chimh hna” (Acts 28:30-31).