PENTECOST NI (Pentecost Day)

Khrihfa mi nih Pentecost ni kan timi a hrampi cu Israel mi phun puai he aa pehtlai mi a si. Kum khat ah puai phun 7 an ngeihmi lakah Pentecost ni cu a sunglawi mi ni ah aa tel mi a si ve. Pentecost biafang cu Greek holh in a ra mi biafang a si i a sullam cu a voi (50) nak a silo le ni (50) nak, zarh sarihnak tiah sullam a ngei.

Pentecost Puai cu rawltuan puai (Exo 34:11, Isa 9:2), Barli an hun tuanmi a phal hmasabik cu Sabbath ni ah Pathian sinah an pek. Cu ni thaizing in an rel i, Sabbath pasarihnak a thaizing kha ni (50) nak cu a si, (Lev 23:15-16). Hi puai ah hin barli thar in an sermi changreu hlum hnih, thilnu phulh lomi kha Pathian sinah an pek chanh. Rawltuan caan hram thawhnak ah Lanhtak puai (Pentecost puai hlan ni 50 ah khan thilnu phulh lo changreu hlum kha Pathian sinah an pek chanh) ah cu thil cu an tuah. Cuti an tuah duhnakchan cu kumthar kan i thawk cang tinak a si. Cun thilnu phulh lomi changreu hlum 50 hnu i pekchanhnak an tuah cu atu cu thil amah ningkel in a kal cang lai tinak caah an tuahmi a si. Cuticun zarh hna puai le thilnu phulhlo chang puai kha an tlaihter hna i thilnu phulhlo changreu puai le Lanhtak puai cu an pehter.

Pentecost puai cu a hram thawk ah rawltuan puai a si ko nain a hnu deuh ah Israel mi Egypt ram in an chuahnak kong he aa pehtlaih caah a sullam a thuk deuh. Israel mi Egypt ram in an chuah hnu thlathum ah Sinai tlang an phan (Exo 19:1) An i thawhnak thla kha Nisan ni 15 hrawng sidawh a si, cucaah Sinai tlang ah Nawlbia a laknak kha ruahnolhnak caah Pathian an thangthat le can an hman venak cu a si. Judah miphun ah mifim minthang a si mi (philo) timi nih cun Sinai tlangah Pathian nih nawlbia a rak pek hna ah khan, thli a hrang, meizik an choi lulhmalh a ti. Cu ve bantukin biakam thar chungah Pentecost ni Thiangtlarau riantuannak cu Luka cauk nih fiangkhun le thuk ngai in a tial. Sihmanhsehlaw David Siangpahrang nun ah kan hmuh mi cu Thiangthlarau nih David chung in bia a chim (Lam 1:16). Profet Isaih nun zongah cu nun cu kan hmuh ve. Pathian cu a zungzal in Pa le Fapa le Thiangthlarau cu a si zungzal ko. Steven cu Thiangthlarau in a khat mipa a si i Judah mi cu nan chanchung dihlakin Thiangthlarau dotu nan si a ti hna (Lam 7:5). Cu caah Pathian nih zeitik chan poah ah Thiangthlarau in rian a tuan ti cu kan hmuh. Sihmanhsehlaw a hleikhun in Pentecost ni ah a hung ttum cu Luka nih a kan chimh.

Pentecost ni Thiangthlarau riantuannak cu Lamkaltu cauk dal 1-13 tiang ah Thiangthlarau ti cu voi 40 renglo a um. Zumtu hmasa Khrihfabu pawl cu Thiangthlarau in a khatmi bu an si ti cu a fiang taktak mi a si ko. Pentecost ni Thiangthlarau cu meizik bangin an choih lulhmalh i lei bantuk meizik pakhat cio nih khan a tongh hna tikah Thiangthlarau in an khat, biachim khawhnak a pek hna (Lam 2:3-4). Nifate an nunnak ah tthawnnak le raltthatnak a petu cu Thiangthlarau kha a si. Jesuh Khrih nih “ka Pa nih bawmtu dang an pek hna lai” a timi (Jn 14:16) chungbia cu Pentecost ni ahcun a tling. Peter nih fiang ngai le raltha ngaiin Sanhedrin hmaiah bia a chim khawhnak cu Thiangthlarau hruinak thawngin a si dih; upa 7 zong kha Thiangthlarau in a khatmi an si dih hna (Lam 6:3) ti kan hmuh.

AD 200 ah Khrihfa hmasa hna nih Easter ni in zarhsarihnak zarhpi ni ah Pentecost puai cu sunglawi ngaiin an rak tuah cang. Cu thawk cun an pehzulh lengmang i saunawn a rauh tikah thianghlim ni an hun ti than. Catholic bupi nih cu ni ah cun thil puansen kha pumhnak caan ah a hman. Thiangthlarau cu zumtu hmasa hna chungah khan a rianttuannak hna kha khuaruahhar ngai mi thil sining in a chim.

(1) Thiangthlarau cu zeizong te ah lamhruaitu a si kha a lang. Filip kha Ethiopia bawipa he a tawntertu… (Lam 8:29) a si. Cun Kornelias nih a thlah mi Lamkaltu hna an ra lai, tiah Peter a chimtu kha…(Lam 11:28). Paul le Barnabas kha Thiangthlarau hruainak loin zeihmanh an tuah lo.

(2) Khrihfa hna nih thil ttihnung kan tei khawhnak, teitu kan si khawhnak, a herh tik caan ah fiang tein bia kan chim khawhnak vialte hi Thiangthlarau riantuannak thawngin an si dih. Cucaah Khrihfa nun hi Thiangthlarau chung nun a si. Cu Thlarau cu kan nunak hram taktak cu a si. Pentecost ni ah hin zeitin dah thil a um set ti hngalh a har ngaingai nain Pathian nih thil lianngan a tuahmi kha fiantertu(phungchimtu) hna nih an kan chimh tikah kanmah holh in an kan chimh tiah kan hngalh cio ti kha Pentecost ni i aa telmi nih an chimmi a si tiah an ti.

Pentecost ni Thiangthlarau riantuannak thawngin holh phun kip a holh mi hna nih an chimmi vialte kha mah holh cio in an rak theih khawh mi kha buaipi lem loin Pentecost (Pentecost Day) cu thawh than ni in ni (40) nak Jesuh Khrih Vancung kai puai (Ascention of the Lord) hnu zarhkhatnak zarhpi ni ah khan Khrihfa hna nih an tuah.