Zungzal laksawng caah timhtuahnak

Bawipa Jesuh hnu zulh aa tim mi hna nih hi vawlei cung chawva co hnga lawng ruahchannak lung put in timh ding a si lo. Bawipa ni James le Johan u nau hna bia a hal hna tikah “Ka din lai ding mi hrai hi nan din khawh lai maw?” (Matt 20:22) tiah bia a hal hna. Nihin thawngtha bia kan thieh mi (Mark 20:28-31)chung zongah a zultu a si hnga ding mi hna nih an ton hnga ding mi harsat nak le hremnak kong fiang tein a chimh hna . Caan tawi te rian tuan i thil tampi hmuh dingin ruahchannak ngeih lo ding in a kan duh piak mi a si. Zungzal a hmun hnga ding mi thil-laksawng cohlaan dingin kan i ruahchan a si ah cun Bawipa bangin harsat nak, temhinnak hna le tukforhnak a phunphun ton ding zong kan i ruah ve hrimhrim ding mi an si.

Bawipa hnu zulh ruangah hi vawlei cung chikhat kan nun lio caan i kan ton hnga ding mi harsat nak hna le zungzal in pek kan si te hnga ding mi van thluachuah he tahchunh ah cun chim phu hmanh an si hna lo. Bawipa nih : “A inn siseh, a lo siseh, a unau si hna seh, a farle si hna seh, a nu siseh, a pa siseh, a fale si hna seh, keimha le thawngtha ruangah a kal takmi nih cun, tam chinchin in atu chan ah hin a hmuh hrimhrim lai. Inn siseh, lo siseh unau si hna seh, far siseh, nu siseh, fa siseh; a let za khat in an hmuh lai; cun hremnak zong an hmuh lia; cun a ra dingmi chan ah hin zungzal nunnak an hmuh lai”(Mark 10:30) tiah a ti.

Mithiang Paul nih a chim mi cu: “Cun harnak hmete caan tawite kan inmi nih hin, hi harnak nakin a let tampi in a ngan deuhmi zungzal sunparnak cu a kan pek lai. Kannih nih kan I zohchihmi cu hmuhkhawhmi thil hi si loin hmuh khawh lomi thil khi an si. hmuh khawhmi thil cu caan tawite lawng a nguh, sihmanhsehlaw hmuh khawh lomi thil cu zungzal in a hmun”(2 Cor 4:17-18) tiah a ti.

Dawtmi u le nau hna, kan mah pakhat nih Pathian rian thiang le a sunpar nak caah kan i pekchanhnak thawngin dawtmi chungkhar u le nau hawikom hna caah zeitluk in dah lunglawmh awk thil kan chuah pi khawh ti hi thei hna u sih. Kan mah nih zeitluk in dah khamhnak rian kan ttuan khawh cio hna i zungzal nunnak van ram tiang in a phanh pi kho tu kan si ti zong hi theih in Pathian rian thiang kha zumh fek tein le fel tein ttuan khawh i zuam zungzal hna u sih.