Thlarau Rawl

“Bawipa Zulh Man”
2021 May 25 (Cacawn Nihnih) ni thawngmha chimnak:
 
“A inn siseh, a lo siseh, a unau si hna seh, a farle si hna seh, a nu siseh, a pa siseh, a fale si hna seh, keimah le lhawngmha ruangah a kaltakmi nih cun, tam chinchin in atu chan ah hin a hmuh hrimhrim lai.” 

Hakha RVA in thawngmha a ngaitu Khrih ah dawtmi nu le pa, u le nau hna, Bawipa nih taksa thlarau ngandamnak le hnangamnak in pe cio ko hna seh. Nihin ah Bawi Jesuh zulh man asiloah Pathian rianmuan man hi zei tluk in dah thluachuah hmuhnak a si timi kong kha nihin i kan rel hngami Gospel zoh in ruat mi hna u si. Gospel relnak kan ngei rih hna lai.  

Marka 10: 28-31
28Cun Peter nih, “A si ahcun, kannih hi tah? Zeizong vialte kaltak in kan in zulh mung,” tiah a hun ti.
29Cun Jesuh nih a thawh hna i, “A inn siseh, a lo siseh, a unau si hna seh, a farle si hna seh, a nu siseh, a pa siseh, a fale si hna seh, keimah le lhawngmha ruangah a kaltakmi nih cun, 30tam chinchin in atu chan ah hin a hmuh hrimhrim lai. Inn siseh, lo siseh unau si hna seh, far siseh, nu siseh, fa siseh; a let 100 in an hmuh lai; cun hremnak zong an hmuh lai; cun a ra dingmi chan ah hin zungzal nunnak an hmuh lai. 31Sihmanhsehlaw atu i a hmasa bik a simi hi, mi tampi cu a hmanung bik an si lai i atu i hmanung bik a simi hi, mi tampi cu hmasa bik an si lai,” tiah a ti.
(Bawipa Thawngmhabia a si.)

    Veikhat ah mirumpa pakhat Bawi Jesuh sin ah a ra i, “Saya, nangmah cu mimha na si. Zungzal nunnak hmuh awkah zeidah ka tuah lai?” tiah a hal. Bawipa nih, “Nawlbia hna kha a na theih ko kah,” tiah a leh. Mirumpa nih, “hi nawlbia vialte hi cu ka ngakchiat lio in ka zulh lengmang ko cang hna,” a ti. Cun Bawi Jesuh nih a chim chap rih mi cu, “Pakhat lawnglawng na bau, va kal law na ngeihmi thil vialte kha va zuar law tangka cu sifakmi kha va mhen hna, cun vancung ah rothil na ngei lai; cun ra law ka zul,” tiah a ti. Cutikah mirumpa cu a hmai a chia i ngaihchia ngai in a kir,” ti a si. Mirumpa nih Bawi Jesuh cu a uar ngai ko asiloah mi tlamtlin cu si a duh ngai ko, natein a rumnak va kal tak i Bawi Jesuh zul tiang kha cu a tuah kho lo, a rumnak kha a duh deuh rih.

    Bawipa nih a mah zulhnak in rumnak a duh deuh mi caah zeitlukin dah Pathian pennak chung luh hi a har timi kong a chim tikah, zeizong vialte kal tak in a mah a zultu Peter nih cun, “A si ahcun, kannih hi tah? Zeizong vialte kaltak in kan in zulh mung,” tiah a hun ti. Zeizong vialte kaltak in kan in zulh mung, zeidah kan ngah lai ti phun khi a si. Cutikah Bawipa nih a chimmi cu, “A inn siseh, a lo siseh, a unau si hna seh, a farle si hna seh, a nu siseh, a pa siseh, a fale si hna seh, keimah le lhawngmha ruangah a kaltakmi nih cun, tam chinchin in atu chan ah hin a hmuh hrimhrim lai. Inn siseh, lo siseh unau si hna seh, far siseh, nu siseh, fa siseh; a let 100 in an hmuh lai; cun hremnak zong an hmuh lai; cun a ra dingmi chan ah hin zungzal nunnak an hmuh lai,” ti kha a si. 

    Zeizong vialte nak in Bawipa zul asiloah amah rian a muan duhmi caah, a zul ngam taktak tu caah cun a ra dingmi chan ah zungzal nunnak lawng siloin vawlei cung hrimhrim ah a let 100 bak ngah a si lai a ti. Minung hi pakhat le pakhat cu kan i lo lo, kan hmuh ton mi a lo lo i, thluachuah kan timi zong kan hmuh ning le kan theih ning hi a lo lo nak tete zong a um kho. Keimah caah cun hi Bawipa nih a chimmi vawlei cung ah a let 100 a timi zong hi a tling taktak tiah ka hmuh mi a si. Pumpek in Pathian ca rianmuan dingah tlinglo tlaklo bu siangbawi ka can ruangah: inn ka ngei lo nain ka kal nak kip ah khui ka ah ka um lai ti donhar awk pakhat hman a um lo i umnak inn a um peng ko; nu le pa le u le nau hna pawng ah um kho lo in ka um na tein, nu le pa le u nau ban tuk in a ka zoh khentu a ka dawt tu ka kal nak kip ah a let 100 in an um; zei ka ei lai ti zong ruah awk um lo in Pathian nih a minung hna hmang in a hlei fuan in a ka pe. Taksa lei in fa ka ngei lo natein ‘Father, Pa’ tiah laimi nih siseh, kawlmi nih siseh, mirangmi zong nih siseh an ka auh. Thlarau lei in fale tampi ka ngei tinak a si. Ka hmuh mi thluachuah vialte ka ruah tikah Bawipa nih a let 100 a ka pe timi ka theih fiang.
 
    Mah hi cu keimah ka hmuh ton mi chungin tlawng pal kan hrawm hna mi a si i kanmah pakhat cio zong kanmah dir hmun cio te in kan ti khawh tawk in Bawipa kan zul caah Bawipa nih a kan pe mi thluachuah cu kan theih cio ko lai tiah ka zum. Khat lei ah kanmah lei in kan ralrin awk a si mi cu: Bawipa ka zul ah cun vawlei ah a let 100 ka hmu lai timi kha focus tuah in, ka ngah lai ti kha a pakhatnak kan chiah sual a si ah cun tlaunak a si ve hoi. Bawipa zul duh taktak si lo in Bawipa a mah kha hman in si-pua-zii a tuah a tim mi ban tuk kan si lai. Bawipa nih, “hremnak zong an hmuh lai,” a timi zong kha phil lo awk a si.  Cuasicaah kanmah i rian le Pathian i rian kha mha te in kan theih thiam a hau. Pathian nih zei dah a ka pe lai, zei zat dah a ka pe lai ti kha kan mah i rian a si lo. Pathian rian a si. Amah nih a duhmi, a mha a ti bantukin a kan pe ko lai. Kanmah i rian cu a mah kha bochan in zul ding, amah duhnak kha tuah ding kha a si. Kanmah lei nih kan rian kha ka ti khawh tawk in kan tuah a si ah cun Pathian lei kha cu chim awk a um lo. Amah rian kha a tuah mheu ko lai ti cu 100% a techia mi asi. 
 
    Bawipa nih a chim duh mi hi vawlei cung thilri vialte nak in a mah dawt ding le zul ding kha a si. Siangbawi, sister, damah saya muan thengtheng a hau tinak zong kha a si lo. Dawtmi nu le pa u le nau hna, nifatin kan nunnak ah zeizong vialte nak in Bawipa Pathain a bochan, a dawt le a zul kho tu kan sinak lai kan Pathian sinah thluachuah thazaang hal in zuam cio hna u si.  Pathian nih vawlei ah a let 100 le vancung ah zungzal nunnak thluachuah in pe ko hna seh.
 
Fr. Peter Lal Zin Thang (Hakha Diocese)