Pakhat le Pakhat i Bawmh

Sifah harsat nak a tong mi hna an um tikah hramh le hnemh nak tuah tawn mi hi a ttha ngaingai mi tuah sernak a si. Tlangcung cawnpiak nak(Matt 5:1-12) hna hi kan zoh tikah aa ralchan mi pakhatcu harsatnak, pakhat cu hnemhnak bia in a langhter kan hmuh khawh.

Mithiang Paul zong nih Corinth khua mi hna sin cakuat a ttial tik zongah an ton lio mi harsatnak hna chung khan thazang peknak bia a chim kha kan hmuh (2 Cor 1:1-7).

Hi kan nunnak vawlei ah hin ahohmanh harsat nak a tong lo mi kan um bal hna lo. Kan duh le duh lo zongah aho paoh nih tong cio mi a si. Jesuh Khrih hnu a zultu Khrihfa hna chinchin cu Bawipa nih a kan chimh bangin “Nan vailam kha i put u law ka hnu in rak ka zul u”(Matt 16:24) tiah timi kan si. Kan tuah hnga ding mi cu hnu lei zoh loin Bawipa lawng zoh i kan vailam kha i put in Bawipa hnu zulh ding hi a si. Jesuh Khrih hrimhrim kha kan hmai ah a kal caah, Amah kha zoh in zulh ve ding a si. Mah hi Khrihfa hna vawlei cung kan nun caan ah kan tuah hnga ding mi a si. Kan hmai in a kal mi Jesuh kha zoh in thazang lak ding kan si.

Harsatnak vailam kan put lio caan zongah hin hnu lei zong zoh lo ding, cung lei zong zoh lo ding, tang lei lawng zong zoh lo ding. Kan hmai lei tu kha dingtheu in zoh in kan kal lawng ah kan tlu lai lo i kan him lai. Kan Bawipa Jesuh Khrih zong vailam tung a put lio ah voi(3) tiang a tlu ko. Sihmahsehlaw, a tho tthan i Calvary tlangpar tiang a kal bantukin kan nih hna zong kan tluk sual nak caan tampi a um ko lai. Tho ve tthan lengmang hna u sih law Calvary tlangpar Bawipa an thahnak hmun bantuk, kan thih tiang hmailei kal khawh i zuam lengmang ve ding kan si.

Kanmah lawng kan si lo, Bawipa kan sinah a um peng ko. Kan pawng te ah hnemh ding le thazang pek ding in a um peng ko (Mattt 28:20). Kan mah hlaan pi ah harsatnak vailam a rak pu cang mi Bawipa sin tu ah khan “ka vailam hi a dongh tiang ka put khawh nak hnga ka bawm ko” tiin bawmhnak hal ding tu hi kan rian a si. Lung rethiahnak a tong mi hna kha a si khawh chungin thazang pek le hnemh ding kan si. Bawmhnak pek le thla campiak hna ding zong kan si. Zeicah kan ti a si ah cun Jesuh Khrih hmanh kha a thazang a dih tuk i hmailei a kal khawh lo tikah Sairin Khuami Simon nih khan a vailam a rak put piak khah. Thlen hripi-thi le hnai he hnunhpah chuihpah in a kal mi Jesuh kha Jerusalem nu ttha hna zong nih an si khawh ning tein an ttah ve khah (Lk 23:26-27). A nu Mary zong nih Calvary tlangpar tiang a zulh i thazang a pek. Minung kan si bangin harsatnak ton cio a si caah pakhat le pakhat thazang i pek ding le i bawmh lengmang ding kan si.

Bawipa nih “Thluachuak mi an si” tiah a timi hi mithiang hlim hna sining dirhmun kha a chim duh mia si. Mah zawn lawng ruat loin midang har an ton caan ah bawmh khawh ding le hramh khawh ding dirhmun in nun khawh ding tiang hi a kan cawnpiak duh mi a si.