Cite le ceunak

Minung cu midang minung hna caah ceunak a pek tu si ding kan si. Miti (lightbulb) cu a rawh tikah cun minung caah zeihmanh san a tlai ti lo. Hnawm a si cang caah hlonh a si cang ko. Cite zong cu a al nak a um ti lo a si ah cun hlonh a si ve. Hlonh mi thil hna cu mikip nih an ke tang ah chiah mi an si cang caah zeihmanh santlaihnak a um ti lo.  Pathian thluachuah a hmu mi minung a si mi paoh nih um sawhsawh loin kan mah le kan ceu khawh tawk, kan al khawh tawk in midang caah tthat hnemhnak kan chuahpi cio a hau.

Thil kan ti khawhnak, kan tuah khawhnak hna cung zongah hin zeihmanh i uanpi nak um loin midang caah tiin lungtak tein kan tuan zungzal ding a si. Thatnak kan tuah mi midang nih kan hmu hna hlah hmanh sehlaw, Pathian nih cun a hmuh zungzal ko. Pathian nih kan tuahser ning cio in a thluachuah a kan pek zungzal ko lai. Thluachuah a kan pek ning cio in ttuan khawh i zuam hna u sih. Thil lianngan a tuah kho mi nih a tuah khawh tawk in midang caah tuah sehllaw, thil fa te lawng a tuah kho mi zong nih a tuah khawh tawk tein tuah khawh i zuam ding a si. Kan si khawh ning cio in kan dir, rian kan ttuan, hmailei kan nor a si ah cun teinak kan hmu zungzal ko hna lai. Kan zeizong vialte cu Pathian sin in kan hmuh mi a si caah a ngeitu Pathian sinah khan aa dawh bik in le aa ttha bik thil sining in pek khawh tthan i zuam cio hna u sih.