Hrawhawk siloin Tlinter awh ah

“Moses Nawlbia hna le profet hna cawnpiaknak kha hrawh awkah a ra, tiah ka ruat hlah u. Annih kha hrawh awkah si loin, an cawnpiaknak kha tlinter awk tu ah ka ra. Mah hihi philh hlah u! Van le vawlei an hmuh chung paohpaoh cu Phungbia hi a deh pakhatte hmanh seseh, a rin pakhatte hmanh siseh an rawk lai lo -  zeizong viate hi a donghnak an phak hlanah cun an rawk lai lo” (Matthew 5:17–18).

Nihin niah Bupi nih a kan pek cathiang (Matt 5:17-19)kan zoh tikah kan vawlei pi hi a hnu lei ah maw a kir tthan cang hnga ti zong in ruah khawh a si. Tlinter nak ti tikah a tling cia mi kha an fir, an hrawh sual or a rawh ruangah maw a thar in remh tthan a si tiin a tling ti lomi kha hmuh tthan i tlinter tthan maw a si hnga?

Biakam hlun chung kan zok tikah phunthum in ruat hna u sih. 1/ nunphung, ziaza konglam he pehtlai in nawlbia 10 kan hmuh khawh. 2/ Biaknak lei phunglam he pehtlai in zeitin tuah ding a si i mah phunglam vialte hna hi a ho sin in dah a tlin te lai timi hna le 3/ nifatin kan nunnak ah zeitin dah phunglam ning tein kan nun hna lai(Pathian duh ning in nun) ti in zoh ding a si.

Nihin cathiang chung kan zoh tikah Bawipa nih “Hrawh ding ah ka ra lo, tlinter ding tu ah ka ra” tiah a ti. Nawlbia 10 hna zong hrawh dingin a ra lo. Tlinter ding tu ah a ra. Lainawn, nauhrawh, fir, midang thil hngar, tbk, hna hi zeitik hmah ah a ttha mi an si bal lo. Buar sual ah cun chiatnak lei a panhter tu lawng te an si. Nawlbia 10 chungah hrial ding mi hna le tuah ding mi hna vialte Pathian hrimhrim nih a kan cawnpaik dih. Tthatlo nak hna kha Hrial khawh ding tthatlo nak kan theih mi hna kha tthlatnak lei in tlinter khawh ding hi kan rian a si.

2/ Nifatin kan nunnak ah nawlbia 10 hna hi zulh ding le tlinter ding, cun fiang deuh chinchin in kan nunnak hrimhrim ah langhter ding an si. “Cucaah cun ahohmanh nih bawlbia lak i a hme bik te hmanh kha zul loin a um i midang zong kha cu bantukin a cawnpiak hna ahcun, cu pa cu Vancung Pennak chungah a hme bik a si lai. Cun Nawlbia kha a zul i midang gzong kha, cu bantukin zulh awk, tiah a cawnpiakmi hna cu, Vancung Pennak ah mingan a si lai.” tiah a ti (Matt 5:19).

Jesuh Khrih a rat hlaan, hlaan lio minung hna hi nihin kan mah hna bantukin a van a ttha mi tiah kan ti kho hna hnga maw? An nih hna nih cu Jesuh Khrih cawnpiak nak hna kha an rak thei manh hna lo. Nihin a nung lio mi kan mah hna nih cun Jesuh Khrih zultu hna sin hrimhrim in Bawipa cawnpiak nak hna kha fiang tein theih khawhnak thluachuah pek kan si hna. Zultu hna cu Bawipa thlah mi Thiang Thlarau Pathian fianhter nak thawngin Bawipa cawnpiak mi vialte a thei-hngaltu an si bantukin, an theih taktak mi le an hngalh taktak mi vialte hna kha tuchan minung hna sin tiang in a kan chanchin tu an si.

Cu a si caah hlaan mi hna nak in thianhhlim deuh ding le Pathian cungah zumhnak fehnak ngeih deuh ding hi kan si. Nifatin kan nunnak ah Pathian cawnpiak ning in a nung mi si khawh i zuam hna u sih. Nunkhhawhnak veel, thluachuah thazang hna zong Bawipa sinah hal zungzal hna u sih.