Bawipa muihmai langhter

Moses nawlbia hna hi kan rel tik le kan ruah tik hna ah aho paoh kan lung chung cio in khua kan ruat men ko hna lai tiah ka ruah mi cu: “Pathian pekmi nawlbia pahra hna hi tlolh lo tein a zul kho dih tu kan um hna hnga maw?” ti hi a si. Minung kan si bangin pakhat khat cu nifatin kan buar cio men hna lai tiin ka ruat tawn. Buar bak loin a um kho mi an um a si ah cun, cu hna cu mithiang hlim mi or vancung mi an si men lai tiah ka ruah.

Jesuh Khrih hrimhrim nih minung hna kan thazang a dernak a theih caah a zultu hna sin in le Bupi sinin sual ngaihchihnak (sacrament of confession) hi a kan tuah piak. Bupi nih a kan tuah piak mi sual ngaihchihnak hna hi teh ttha tein kan tuah cio tawn hna maw ti zong hi ruah cio ding a si.

Minung cu kan mah le kan mah aa khamh kho lo mi kan si caah Bawipa hrimhrim nih kan sual-palh nak vialte caah a kan in piak cang, a kan tlenh cang timi cu kan theih; sihmanhsehlaw, Bawipa nih nawlbia a kan pek mi “Dawtnak” (Matt 22:37-39) hna hi teh kan zul taktak kho cio hna maw?

Minung cu Pathian nawl kan zulh le a duh ning in kan nun a si ah cun Pathian mithmai hmanh a hmu kho mi kan si (Exo 24:3-11). Peter, James le Johan hna zong nih Bawipa muihmai aa thlen lio an hmuh khawh (Matt 17:1-8). Bawipa cawnpiak ning in a nung mi kan si ah cun kan mah chungin midang hna nih Bawipa muihmai an hmuh khawh lai. Zeicah kan ti a si ah cun kan nih hna cu tlanh mi kan si cang caah a si. Midang hna cungah Bawipa muihmai a cuanter kho tu si khawh i zuam zungzal hna u sih.