Bawipa Thlacamnak

Vancung a um kan Pa thlacamnak hi kan Bawipa Jesuh Khrih hrimhrim nih a kan cawnpiak mi thlacamnak a si i nifatin thla kan cam tik zongah kan cam zungzal mi a si fawn. Bawipa cawnpiak mi thlacamnak hi kan zoh-ruah tikah a tling hringhran mi thlacamnak a si.

Kan innchungkhar cio ah siseh, kan hawikom hna cungah siseh, kan pawngkam a um mi hna cungah siseh, pakhat le pakhat i theih-palhnak le i thangchiatnak, i ruah sualnak timi hna hi nifatin kan nunnak ah kan ton mi a si. Kan mah hna lawng siloin hlan minung hna zong nih an rak ton-palh cio mi zong a si. Jesuh Khrih dah ti lo ah cun aho minung hmanh a tling dih mi kan um lo. A palh lengmang mi minung lawng te kan si dih ko.

Cu asicaah nifatin kan nunnak ah pakhat le pakhat i ngaihthiam khawh ding timi tuah sernak tuah khawh dingin kan i zuam cio nak hi a si. Pakhat le pakhat kan i ngaihthiam chung paoh cu Pathian zong nih kan sual-palhnak a kan ngaihthiam zungzal ko lai. Tukforhnak timi hi a tu le tu kan ton mi a si caah Bawipa nih hrial khawhnak ding thazang le pakhat le pakhat cungah kan sual-palhnak i ngaihthiam khawhnak thazang kan ngeih khawh nak hnga ding caah hi thlacamnak hi a kan cawnpiak mi a si.

Thlacam ning cang a kan cawnpiaktu cungah bochan duhnak lungthin kan ngeih lo a si ah cun kan ton mi tukforhnak hna hi kan tei kho hna lai lo. Fikfa, ngalsang, tho le hmaifa(insects) tibantuk hna nih mei-alh an hmuh paoh ah an zuan hnawh, an i paih i an thih bangin kan nih minung hna zong nih thil tthalo kan thieh ko buin mei-alh he aa lo mi sual-palhnak chungah kan i paih, kan tla lengmang tawn.

Bawipa nih a kan cawnpiak mi thlacamnak hi ttha tein ruat hna u sih law duhsah tein cam zungzal hna u sih. Tukforhnak tei khawhnak thazang zong Amah sinah hal zungzal hna u sih.