Lungthin umnak in Khamh si nak

Keimah inn, keimah lo, ka thil a si, ka tangka a si tiin “keimah” timi cung lawngah kan lungthin a um a si ah cun midang cungah zawn ruah thiamnak kan ngei lai lo i ka hakkauhnak chung ah kan thi sual lai.

Kan Bawipa Jesuh Khrih nih nihin cathiang (Matt 6:19-23) chungin a kan cawnpiak mi cu “Rungrul le cerik nih a ei khawh i mifir nih an fir khawhnak vawlei ah hin nan chaw va khong hlah u” tiah a kan ti. A rawk kho mi hmunhma ah kan lungthin a um zungzal a si ah cun zeitin dah a rawk kho lo mi hmunhma cu kan phanh khawh lai?

Kan chawva, kan ngeihchiah thilri vialte hna hi a hman zia thiam in a rawk kho lo mi hmunhma “Vancung Pennak” phanh khawh nak ding tu ah lungthin tak tein hman ding a si. Sihmanhsehlaw, vawlei thilri kawl ti lo ding maw a si hnga tiin kan ruah men ko lai. A si hrimhrim lo; nifatin kan nunnak kan peh khawhnak ding caah cun kan hman ve hrimhrim cu a hau ve ko. Zeicah tiah cun minung nih kan nunnak hi kan mah te in hrawh le thah ding a si lo. Sertu Pathian pek mi nunnak cu Pathian ta a si caah Pathian lawng nih a lak khawh. Pathian nih kan nunnak a kan lak piak hlan chung paoh cu zohkhenh ding a si.

Sihmanhsehlaw, kan lungthin le kan ruahnak hna cu vawlei thilri ah siloin Pathian sinah chiah ding a si. Pathian sin kan chiah mi chawva vialte cu Amah Pathian nih him tein le ttha tein a kan a kan khon piak lai i a kan zohkhenh piak zungzal ko. Mithiang Paul nih: “Kaa porhlawt awk a herh a si ahcun zeitluk in dah a derthawmmi ka si a langhtertu kha kaa porhlaw lai”(2Cor 11: 30) tiah a ti. Kan nih vialte hna zong a kan sertu Pathian, a kan uktu le a kan ngeitu Pathian lawnglawng kha i porhlawt pi ve hna u sih.