Aho hnu dah kan zulh?

Jesuh Khrih nih: “Ahohmanh bawi pahnih sal nan si kho lai lo; pakhat kha nan dawt deuh lai i pakhat kha nan huat  deuh lai; pakhat sinah khan cun zumhawktlak tein nan um lai i pakhat tu kha cu zei ah nan rel lai lo. Pathian le tangkha cu an rian nan ttuan kep kho lai lo” (Matt 6:24) tiah a ti.

Nihin kan theih mi cathiang (Matt 6:24-34) chung kan zoh tikah ahohmanh bawi pahnih sal si khawh lo nak kong fiang tein Bawipa nih a kan cawnpiak. Bawi pahnih sal nan si kho lai lo tiah a ti duh nak sullam cu, phaisa hnu lawng zul hlah u, vawlei chawva cung lawngah hin hakkhauhnak ngei hlah u! tiah a kan ti duhnak a si. Vawlei chawva sui le nung, phaisa cung lawngah kan thinlung a um a si ah cun Pathian kan philh sual lai.

Minung cu phaisa tam deuh kan ngeih tikah kan ruam a kai tawn. Phaisa kha siangpahrang le zeizong vialte a tuah kho tu ah kan ruah i phaisa in rumnak a si lo mi vialte kha kan ke tangah chiah kan duh hna. Kan nunnak a kan uk tu le a kan sertu Pathian hmanh kha kan pial tak i kan philh.

Jesuh nih a thim mi a sal ttha mithiang Paul nih cun “Cucaah cun Khrih tthawnnak nih a ka huhphenh ti kha ka hngalh nakhnga, ka derthawmnak ah hin lunglawm tein kaa porhlaw cang. Ka derthawmnak ah siseh, nihsawhnak le harnak le hremnak le temhinnak ka hmuhmi ah siseh, Khrih ruahah kaa lawm ko; zeicahtiah ka derthawm tikah hin ka tthawn a rak si” (2 Cor 12:19) tiah a ti.

Taksa in a nung i vawlei cungah a nung mi minung kan si ko nain vancung ram co ding caah sermi minung kan si caah, Pathian dah ti lo cun a dang thil hna cungah tlaihchannak zeihmah ngei hna hlah u sih.

Cuticun nikhat le nikhat kan nunnak ah hin Pathian duh ning in nung hna u sih. Vawlei chawva sal siloin, Pathian duh ning in a nung kal mi sal ttha si khaw i zuam zungzal hna u sih.