Cuai thlai

“Pathian nih an soi nakhnga lo, mi va soi hna hlah – midang na soi hna ning te khan Pathian nih an soi lai i midang cung i na hmanmi tahnak te kha Pathian nih na cungah a hman ve lai”(Matt 7:1-2).

Minung hi mah hngal loin midang kong a hngal mi kan tam deuh. Mah kong ruah satsai loin midang kong chim le ngiat a hmang mi kan si. Cu tikah a herh lo mi palhnak tamtuk kan tuah sual tawn i mualpho, thangchia in kan um tawn.

Bawipa nih cun midang thangchiat ding siloin mah palhnak le sualnak tu kha i chek ding le i dah ding in a kan cawnpiak. “Midang cung le Pathian caah zeibantuk ngaihchiatnak dah ka tuah sual; nihin ni ah zei bantuk nun zia in dah ka nun” timi hi kan i dah lengmang ding a si. Cu tin kan tuah a si ah cun kan zang dernak kha kan i thei lai i tthatnak lei ah kan i mer kho tthan hna lai, kan i remh kho tthan hna lai.

Midang zang dernak hna kha kan hmuh tik zongah “aw kei zong amah bangin ka rak palh bal ve” timi theih hngalhnak kan ngei lai i midang cungah zawn ruah thiam nak le ngaihthiam khawhnak lungthin kan ngei kho hna lai. Cun, Bawipa cawnpiak mi thlacamnak “Mi nih kan cungah tthat lonak an tuahmi kan ngaihthiam hna bangin kan tthat lonak cu kan ngaithiam ve ko” (Matt 6:12) tiah thla kan cam mi zong kan tlinh khawh lai.

Midang cungah soisel nak tuah loin, mah palhnak aa remh kho i Pathian lei a hoih kho zungzal mi Pathian fanu/pa si khawh i zuam hna u sih.