Zawn ruah thiamnak

Dawtnak le zawn ruah piak thiamnak lungthin a ngei mi paoh cu Pathian thluachuah an hmu zungzal. Minung cu midang kan dawt ko hna ee kan ti lio caan zongah kan mah caah dawtnak kan i chiah mi a um zungzal tawn ko. Midang zawn kan ruat ko ee kan ti lio caan zongah kan mah zawn kan i ruat hmasa lengmang tawn ko.

Pathain a ttih zah mi le a nawl a zul mi biakam hlun chungum kan pu pa hna nun ning kan zoh tikah, Pathian duhnak kha an duhnak nganbik ah an chiah hmasat i cu hnu lawng cun an mah duh mi le tinh mi hna kha an tuah tawn. Cu tin an nun tikah an hmuh mi laksawng cu Pathian thluachuah a si.

Abraham nun zia kan zoh tikah ttha tein a theih bal lo nak hmun le hma ah Pathian nih kal dingin a fial tikah zumhnak he a kal i miphun nganpi i “pa” sinak thluachuah a hmu mi a si. (Gen 13:14-18) kan zoh tikah fiang tein kan hmuh khawh.

Abraham satil cawng hna le a raulchan Lot satil cawng hna an i sik lengmang tikah, Abraham nih a rualchan Lot cu satil cawngh nak ding caah le um hmun khuar nak ding caah a duhnak hmun a thimter i a kal ter. Lot nih a minung sining mithmuh in a ttha tiah a ruah mi hmunhma hna kha aa thim hna i a kal. Abraham nih cun a tang mi, Lot nih a duh lo i a kal tak mi hmun tu kha aa lak. Sihmanhsehlaw, Abraham cu Pathian aa bochan mi a si bangin minung mithmuh ah a ttha deuh lo tiah kal tak cang mi hmun hma hmanh kha thluachuah he a khat mi hmunhma ah aa cang ko.

Nihin kan rel mi cathiang chung (Matt 7:6, 12-14) kan zoh tikah, Bawipa nih: “Mi nih kan cungah tuah hna seh ti nan duh bantuk khan midang cung zongah va tuah ve u. Kutka bi chungah cun lut tuah u. Nunnak a phanmi lam cu a har i a kutka cu a bi i a hmumi cu tlawmte lawng an si” tiah a ti.

Midang nih kan cungah tthatnak tuah hna seh ti kan duh bangin midang cungah tuah ve ding le, kutka bi he aa lo mi mah zawn ruah duhnak lungthin i sum in Pathian duhnak lam kha zulh ding hi Bawipa nih a kan duh piak mi a si. Minung sining in kan hmuh khawh lomi Pathian programme a thli tein a um tawn ti zong theih ding a si.

Kutka bi “Pathian duhnak lam” hmuh thiamnak fimnak kan ngeih khawh nak hnga ding caah le cu lam cu a zul kho mi kan si khawh nak hnga ding caah Pathian sinah thluachuah hal zungzal hna u sih.