Zumhnak in siseh

Pathian Pennak vancung ram lei hoih in khual kan tlawn, kan kal tikah zumhnak in kal le khual tlawn a si. Zumhnak ngeih lo ah cun phanh khawh a fawi lomi zong a si.

Nihin kan rel mi cathiang (Matt 8:5-17) chung kan zoh tikah Jesuh nih ral bawipa zumhnak a thangtthatnak kong kan hmuh. A thangtthat lawng siloin Israel miphun hna chung hmanh ah ral bawipa zumhnak bantuk a ngei mi an um lo nak kong zong a langhter fawn.

Zumhnak kong he pehtlai in a caan ah cun kan ruah lomi minung hna sinah tthawng ngai in a um tawn i Pathian rianttuan tu a si tiah ruah mi hna chung hmanh zongah hin der ngai a in a um zong kan hmuh khawh tawn. Pathian dawtnak, vel le zangfahnak in a khat mi a Pennak ram hoih in kan kal tikah zumhnak timi hi a biapi tuk mi a si. Zumhnak a der a si ah cun Bawipa tthatnak le dawtnak hna zong hmuh khawh a si lo i palhnak lam pingpalo ah phanh khawh a fawi. Bochan awk a ngei ti lomi bangin ttihphannak nih a tei cikcek a fawi i midang cung zongah zeibantuk tthatnak hmanh khawh a si ti lo.

Cu a si caah pakhat le pakhat zong hi ngeihchiat ttihphannak ton a si tikah thazang aa pe zungzal ding kan si. Pakhat le pakhat thazang kan i pek tik zongah Bawipa min le a tthawnnak hi hmasa bik ah langhter ding le phuan ding a si. Pakhat le pakhat ca zongah lungthin thiang tein tha kan i campiak zungzal ding a si. Phungthlukbia chungah kan hmuh mi cu: “Mitha mi hna thlacam nak cu Bawipa nih a cohlaan”(Phung 15:29) tiin kan hmuh.

Kan zumhnak nikhat hnu nikhat a tthawn chinchin khawh nak hnga ding caah Pathian bia “Bible” thiang hi rel lengmang ding a si. Bawipa nih a cathiang chung in lam ding le lam hmaan a kan hmuh sak ko lai. Pathian bia thiang kan theih mi chungin kan zumhnak tthawnter hna u sih. Kan zumhnak a tthawn khawh nak hnga ding caah Pathian sin ah thlacam hna u sih. “Bawipa kan zumhnak hi nganter deuh tuah” (Lk 17:5).