A hmaanmi le a dingmi thil tuah hi ka nawlbia zulh a si(Gen 18:19)

Bawipa nih Abraham sinah: “A hmaanmi le a dingmi thil tuah hi ka nawlbia zulh a si” tiah a ti (Gen 18:19).

Biachimrel a thiam mi hna nih kapkhat le kapkhat, phukhat le phukhat kar ah daihnak or remnak an tuah bangin Abraham zong nih Pathian sinah ngaihthiam halnak ttavuan aa lak (Gen 18:16-33) i biachiamnak a tuah.

Minung pakhat le pakhat kar lakah biafak, biahrang chim a hmang mi hna hi hrial an si tawn. Bianem le biathlum nih lunthin a nemter, a thlumter i lungthin a hak mi hmanh nih an ceilh kho hrim lo. Vawlei cung hruaitu upa hna nunning kan zoh tik hna zongah nun a nem mi hna le bianem biathlum a chim thiam mi hna nih minung lungthin an tleih khawh deuh i mipi caah rian an ttuannak zongah tlam an tlinh khawh deuh. Lungthin a nem mi hna nih hin daihnak rian an ttuan khawh deuh. Zeicah tiah cun “Keimah” timi lungthin a ngei mi hna kar lak ah daihnak a um khawh lo bangin, cu bantuk lungthin a ngei mi hna zong nih an dir hmun an thlah duh lo caah daihnak le remnak cu a chuak kho lo. Keimah tiin aa nganter bikmi lungput an ngeih caah a si.

Abraham cu mi rum, thil ti kho mi zong a si ko na in Pathian duhnak kha a duhnak nganbik ah aa chiah khawh zungzal caah Pathian nih a dawt, a thangtthat i thluachuah tampi in a rak pek .Toidor nak lungthin a ngei mi hna lawng nih Pathian cawnpiak mi nawlbia hna hi an zulh khaw. Toidor nak lungthin he “A hmaanmi le a dingmi thil a tuah kho zungzal tu” kan si khawh cio nak hnga ding caah Pathian sinah thluachuah-vel hal hna u sih.