Zangfah thiam lungthin

Tiva cu a sannak in a niamnak lei ah a luan bangin Pathian zangfahnak le dawtnak cu mi tang aa dor mi hna cungah a luang ve. Tlangpar ah ti aa dil bal lo bangin mi thinlung puar le ruamkainak lungput a ngei mi hna cungah Pathian zangfahnak a um kho ve lo.

Zangfah a thiam mi Pathian cu midang cungah zangfahnak lungthin a ngei mi hna sin ah a um i an nih kha: “lunglawm mi nan va si dah! Pathian nih an zangfah hna lai”(Matt 5:7) tiah a ti. Tidil a kauh nak hmun ah ti tampi in aa dil bangin dawtnak lungthin ngan a ngei mi hna sinah Pathian thluachuah-vel tampi in a um ve.

Zangfahnak lungthin a duh mi Pathian nih zangfahnak thawinak pekchanhnak lungthin a duh. Zangfahnak lungthin kan ti tikah biafang lawng si loin biafang hnu ah tuahsernak nih a zulh tawn.

Mithiang Fostina nih zangfah thiamnak lungthin he pehtlai in tuah sernak phunthum in langhter khawh a si tiah a ti. Pakhatnak ah: dawtnak biachim, sual ngaih thiamnak le a ngahi chia mi hna hramhnak biachim hi a si. Pahnihnak ah: midang caah thlacampiak a si i kan hmurka in kan chim thiam lo mi hna kha lungthin tak tein Pathian sinah thla kan campiak hna nak in kan langhter khawh. Pathumnak ah: midang caah tthatnak rianttuan(charitable works) a si. Midang caah tiin tuahsernak ttha kan tuah tikah hin thil fa tein tuah hram thawk khawh a si. Cubantuk thilfa te kan tuahsernak in Pathian nih hmanung bik ni biaceihnak ah laksawng a kan pek te lai(Matt 25: 31-46) tiah a ti.

Midang cungah zangfah thiamnak lungthin a ngei mi hna cu Pathian nih a zangfah ve hna lai.