Rev. Fr. Andre Bareights Philhlonak

REV. FR. ANDRE BAREIGHTS (M.E.P)

Fr. Bareights cu December 15, 1930 kum, France ramah a chuak. December 18 ni ah tipil a ing. A ngakchiat tein cinthlaknak lei, sa`til zuatnak lei kha a duhmi a si i Sianginn khar caan a chuahkehnak khua lei a tlun chel ah a hawile he nuamte in lente i celh kha a uar mi a si.

Fapa pali lakah upabik a si. 1936 – 1942 tiang Siangniam le Sianglai ruun a kai. Octtober 1, 1949 kum ah M.E.P Sianginn Paris ah a lut. May 29, 1955 Pentecost ni ah Siangbawi thar (20) hna he Siangbawi cannak a hmu ve. Amah cu kawlram Mandalay Diocese i mission rian`tuan ding thlah mi a si ve. Culioah mission rian`tuan mino Siangbawi hna kawlram luh a har lio caan a si. Amah he Siangbawi pa (4), vissa an hngah chungah Scotland ah a kal i mission rian bawmh pah in Mirang holh a cawng. 1957 kum January in May thla tiang France chaklei kibik i Little Catholic University ah sii lei thiamnak, Gregorian Pathian hla fimthiamnak kha a cawng. Cu kum October 17 ah kawlram luhnak nawl a hmu i November 28 ni ah Yangon a phan. 1958-59 kum ah Shwebo ah thlah a si i Kawlholh a cawnpah in mission rian a `tuan.

Vawleicung ralpi pahnihnak a dih tikah Bishop Faliere nih 1959 kum ah Hakha lei ah a thlah. 1959 kum February thla thawkah Hakha a phan. Hakha holh a cawn hmasa. Ahnu ah “Lautu” timi cahmai (50) aa telmi cauk chuah khawhnak tiangin holh a thiam.

1966 kum ah Fr. Bareigts cu kawlram in a kir `than. Paris a phanh tikah miphun `tengnge holh, nunphung hna kha thukdeuh in cawn dingah a uktu hna nih an forhfial. 1966-1969 tiang cu fimnak a cawn peh buin 1969 kum June thla ah ‘Lautu holh, ca le nunphung’ timi tlangtar in cathluan a pek i M.A Degree an pek. Siangcachim hna nih a cathluan hrambunh in Paraku (Ph. D) degree lakter an duh nain ramdang lei mission rian`tuantu aa thim deuh caah 1970 kum August 4 ah Taiwan ah an thlah `than. 2005 kum October 7 a thih ni tiang Taiwan ah mission rian`tuan in a rak um.

*A cung lei kong hna he pehtlaih in Cauk. Article a `tialmi tampi a um.

(History of Catholic Mission in Chin Hills, Diamond Jubilee, Mindat P. 158-160)

 HNARING I BIAKNAK KARHTER HRAMTHAWK NAK

1959 kum January 11 ni ah Mandalay Bishop Faliere nih Hakha le Matupi kar biaknak karhter dingin `tuanvo peknak bantukin Rev. Fr. Muffat, Fr. Lespade, Fr. Roy le Fr. Dixneuf he hmunkhat in Laitlang lei an rak kai i 1959 kum February thla ni 12 ah Fr. Roy le Fr. Bareigts cu Hakha khua an rak phan. Cu kum May 27 in June thla 17 ni tiang Hakha le Matupi karlak Fr. Bareigts umnak kawl ding ah ni 22 rauh in khual an rak tlawng i khuate (28) an phan. Lamhruaitu ah Saya Sum Hrang (Cal`thawng) nih a rak zulh hna. Hnaring, Matupi, Surkhua, Sakta – khuali lawngnih tluninn an rak onh hna i a dang khua (24) nih tluninn an rak onh hna lo.                

Fr. Bareigts Diary

Lautu Circle Chairman U `Thio Ling (Bishop Lucius Hre Kung pa) nih Hakha in lam a rak hruai hna i May thla 30, 1959 kum ah Hnaring an rak phan. Bangla ah an riak. A thaizing ah Hnaring bawi Pu Lian Kulh, Circle Chairman Pu `Thio Ling, Hnaring (B) Khuabawi Pu Mang Thang le tlangpi hna an i pum i Fr. Bareigts kha Hnaring khua ah umnak nawl an rak pek. Pu Thar Kung inn kha MMK 400/- in an cawk tak i Father pawl cu Matupi ah an lan. Rev. Fr. Roy nih rak thlah in 1959 kum ah Fr. Bareigts cu Hnaring a rak phan `than i a inn ah a um.

Hmasabik Missa cu Khrih Siangpahrang Puai ni ah a rak tuah. Fr. Bareigts rian bawmh dingah Pu `Thio Ling nih Michael Mg. Hre Hmung a rak chimh piak i 15-11-1959 ni ah Catholic ah a rak luh ter. 29-11-1959 zarhpi ni Missa thawkin Michael Hre Hmung nih pumh hruai hram a rak thawk. Cu ni thawkin Missa hruai rian, Siangbawi pa kha Lautu holh cawnpiak nak, Lautu ca sernak, Lautu ca rel, Thlacamnak cauk, Hla cauk chuahnak rian hna an rak `tuan i laksawng (thlahlawh) caah Father pa nih MMK 20/- a rak pek.

Fr. Bareigts cu 1966 kum, an ram France ah a kir `than.