Dawnkhaan tu maw Pehtleihter tu dah?

Dawnkhaantu hauka bantuk maw kan si pehtlaih tertu hlei bantuk dah kan si?

Nikhat cu Pathian bia cawnnak a um i cawnpiaktu saya pakhat nih Jesuh nih ngakchia hna a dawt hna nak kong: “ Ngakchia cu ka sinah ra ko hna seh, dawn hna hlah u”(Matt 19:14) timi kong lungtho ngaiin a Khrihfa hna kha a cawnpiak hna. Cu lio te ah cun ruah lo pi in ngakchia kum note pakhat fakpi in au i a ttap ti a si. Cu tikah a nu nih a fa te cu a cawi i cawnpiak nak hmun in leng ah chuah a hun i tim. Cawnpiak tu pa nih cun “A poi lo, tthu ko. Na fa te ttah mi aw nih hna a ka hnawh lo” tiah a hei ti. Cu tikah a nu nih cun “ngakchia ttah aw nih hna an hnawh lo nain nangmah na aw nih ngakchia hna a hnawh tuk” tiah a leh i leng ah a chuah ti a si.

Kan nunzia kan chimrel mi hna nih hin kan hawi le si hna seh, pawngkam um mi si hna seh, Pathian he a naihter deuh kho tu le pehtlaih duhnak lungthin a ngeihter deuh kho tu si ding a si. Khrihfa kan si caah Jesuh nunzia le cawnpiak mi vialte a cohlaang mi kan si. Kan cohlaan caah zulh dingin(ready) timhcia in a um mi kan si ti zongin ti khawh a si. Kan zul kho taktak hna maw? Jesuh Khrih nunzia ruah tthan in kan nun i check zungzal ding a si. Jesuh sin in nunzia dawh cawnding tampi kan ngei ko. Jesuh Khrih cu a nun a nem mi le toidor nak lungthin a ngei mi a si(Matt 11:29).

Nu le pa si hna seh, cawnpiak tu si hna seh, phu hruaitu si hna seh, Jesuh Khrih le midang kar lak ah vanpang bantuk, hauka bantuk dawnkhaan tu si ding hrim a si lo.  A niam mi (Toidornak le dawtnak in a khat) mi hlei ah cun ngakchia siseh, tar siseh ahopaoh an kai kho i an zawh kho. Pathian le minung a remter tu le a pehtlaihter tu Khrihfa ttha “Hlei” kan si zungzal ding a si.