Thil hmuh ning

Thil sining hmuh khawhnak mit ngeih lawng si loin an tthatnak le an i dawhnak hmuh thiam hi a herh deuh.

Minung pahnih nih ti an chiahnak ralca an zoh i pakhat pa nih “ti cenceo lawng a um” tiah a ti. A dang pakhat nih aa thawh ve i “ ralca a khahnak hnga ding caah cenceo aa duh rih” tiah a ti ve. An zoh mi aa khat ko nain an hmuh ning aa dang. Minung pahnih nih rose pangpar an zoh i pakhat pa nih “a hling a um ko nain a par cu aa dawh ngai” tiah a ti. A dang pakhat nih “a par aa dawh ngai ko nain a hling a tamtuk” tiah a ti.

Thil kan hmuh ning hna hi leng lei in thil a cang mi hna nak in kan thinlung chungin a hung chuak mi hna he hin thil kan hmuh ning hna hi pehtlaihnak an ngei deuh. Lungthin ttha a ngei mi hna nih midang cungah thil ttha an hmuh khawh deuh. Kan hmuh ning hna hi kan thinlung chungin a hung chuak mi an si.

Nihin kan rel mi cathiang (Matt 9:32-34) chung in ruah tti ka duh mi cu; khuachia nih a tuah i a holh kho lomi pa Jesuh nih a damter tikah mipi hmuh ning le Farasi mi hna hmuh ning aa dannak kong a si. Mipi cu an khuaruah a har tuk i: “Hi bantuk thil hi Israel mi lakah kan hmu bal lo” tiah an ti. Sihmanhsehlaw Farasi mi hna nih cun, “Khuachia tthawl khawhnak nawl a petu hi khuachia bawi a si” an ti. Jesuh tuah sernak kong he pehtlai in an hmuh mi thil sining cu aa lo ko nain mipi tu nih khan  tthatnak lei kap in an hmuh khawh i Pathian phungbia cawnpiak tu Farasi mi hna nih cun chiatnak lei tu in an hmuh.

Midang chiatnak leikap kawl le hmuh khawhnak leikap ah a khul a rang mi hna cu midang tthatnak le dawtnak lungthin ngeihnak lei kap ah hin cun an hmuh khawhnak mit a maw tawn. Minung cu zeitluk in a sual mi a si tiah ruah mi hna zong nih an saul an palh dih khawh lo bangin, mittha a si tiah zumh mi hna zong an ttha- an ding dih kho ve bal lo. Pathian Fapa Jesuh Khrih dah ti loin cun herh baunak um loin a tling dih mi minung ahohmanh kan um lo.

Cu asicaah, thil sining hmuh khawhnak mit ngeih lawng si loin an tthatnak le an i dawhnak hmuh thiam hi a herh deuh ngai mi a si.