Jesuh Khrih ah thleidannak a um lo

Khamhnak rian (mission rian) timi cu mah innchungkhar chungin thawk ding a si.

Nihin bupi nih a kan thim piak mi cathiang (Matt 10-1-7) chungah “Jentail mi ram ah siseh, Samaria mi hna khua ah siseh, va kal hlah u” tiin kan hmuh mi hi “Jesuh cu mi thleidan a hmang mi a si” tiin a sual puhnak a ngei mi hna zong an um. An ruah ning bangin Jesuh Khrih cu a si hrimhrim lo. Bible catlang pakhat kan rel tikah hin kan rel mi biatlang te lawng kha zoh loin kan Bible cauk chung um mi catlang vialte hna he a pe tah in rel phung a si.

Sibawi (doctor) si hna seh, engineer si hna seh, sianginn kai an dih bakin rian biapi tuk mi le rian ngan tuk mi zeitik hmanh ah an fial bal hna lo. Zeicah tiah cun an palh khawh caah a si. Palhnak a um sual ah cun sunghnak a ngan tuk caah a si fawn. Sibawi thar tete hna nih thlopbul a fawi mi zawtnak – lufah, raifanh, tbk, in thlopbul rian an thawk tawn.

Kan Bawipa Jesuh Khrih zong nih a zultu 12 hna thawngttha bia phuan dingin a thlah tik hna zongah mah miphun aa lo mi hna chungin a thawkter ve hna. An chungkhar hna chungin a thawkter hna ti ko hna u sih. Sihmanhsehlaw Jesuh thihnak in a thawh tthan hnu Vancung a kai hlan a zultu hna sinah thawngttha bia phuan dingin a fial tik hna ah cun: “Khuazakip ah va kal u law miphun vialte kha ka zultu ah va ser hna u”(Matt 28:19) tiah nawl a pek hna i rian a fial hna.

Kan Bawipa Jesuh Khrih hrimhrim zong nih hi vawlei cung a rak rat lio, minung sining in hrin a rak si lio ah khan a miphun “tuu congtu hna” sin ah aa rak i hmuhter hmasabik hna. Cu hnu lawng ah cun ramdang lei mifim hna nih an hmuh, an ton an biak khawh(Matt 2:11).

Johan ttial mi thawngtta bia kan rel tikah fiang tein kan hmuh mi cu, Galilee ram Kana khua i a um mi Israel mipa tthitumhnak puai ah “Pathian sining in khuaruahhar thil a tuah” i a lawmhpi ve hna nak kha kan hmuh khawh. Tthitumhnak puai a tuah tu pa zong hi mirum le mi chawva ngei ngai cu a si lai lo. Zeicah tiah cun puai ah a ra mi hna nih zaa lakin din khawh dingin misur hang a ngei lo. Jesuh Khrih nih minung hna a kan dawt ning le kan mual phoh hnga ding mi a kan duh piak lo ning kha cu puai ah cun a langhter. Cun Farasi mi pakhat a si mi Nicodemus he zong tonbiaruahnak an ngei. Cu pinah Jacob tikhur pawngah Samaria nu pakhat he zong bia an i ruah hlei ah Samaria khua mi hna zong a ton hna i Pathian bia a cawnpiak hna.

Cuasicaah mithiang Paul nih a langher mi cu: “Judah mi le Jentail mi, sal le luatmi, nu le pa karah zeihmanh thleidannak a um ti lo, Khrih Jesuh he nan i pehtlaihnak thawngin pakhat nan si dih cang” tiah a ti(Galati 3:28).