Ngaihthiamnak

“Cuka inn i a ummi nih tluninn an in awnh hna lo ahcun daihnak in nan biakchawnh hnanak cu i lak tthan u” (Matt 10:13).

Daihnak kong  he pehtlai  in dirpi le chimrel tikah a cohlaang duh lo mi an um tawn. Cubantuk thil sining ton a si tikah thinhunnak le ngaihchiatnak zeihmanh um lo tein um thiam ding caah Bawipa nih a kan cawnpiak duh mi a si.

Samaria mi hna um nak khua pakhat nih Jesuh le a zultu hna an cohlaan duh hna lo tikah James le John an thin a hung i: “Bawipa, hi mi hna hrawhnak ding caah hin vancung in mei au u tiah na kan duh maw? tiah an ti. Jesuh cu aa mer i a sik hna i khua dang ah khan an lan” tiah ngaihthiam nak kong he pehtlai in Luke nih a thawgtha chung ah a langhter(Lk 9:54-56).

“An caah tthatnak siseh tiah kan chimh ko hna cu ta, zeiruangah dah an cohlaan duh lo” tiin kan mah le kan mah lung tthat lo nak kan i pek a si ah cun zeitikhmanh ah kan thinlung a dai kho bal lai lo. Cu ruangah cun pei Jesuh Khrih nih “an cohlaang duh lo mi hna cu kal tak ko hna u” tiah a kan ti nak a si cu. Ngaihthiam nak cu daihnak hrampi a si nak kong Bawipa hrimhrim nih lam a kan hmuh sak i a kan cawnpiak.

Joseph zong a unau pawl nih a cungah tthat lo nak an rak tuah mi vialte kha a ngaihthiam tthan hna i ttha tein a chawhbiak tik hna an chungkhar tein lunglawmhnak le daihnak , i rual remnak an ngei tthan. A unau pawl nih an rak hlawt ko nain Bawipa nih zeitikhmah ah a haw bal lo timi kha Joseph nih a unau hna le mi vialte hna sinah a langhter(Gen 45).

Midang nih a kan hlaw ko hmanh hna seh, ngaihchiat harsatnak kan pe ko hmanh hna seh, Bawipa nih cun zeitikhmah ah a kan hlaw bal lo i a kan kal tak bal fawn lo; a kan umpi zungzal ko. A kan hlaw tu hna le harsatnak a kan pe tu hna cungah ngaihthiamnak kan langhter khawh a si ah cun kan thinlung chungah daihnak a um zungzal ko lai. Daihnak Siangpahrang Pathian Pennak chungah luh kan duh a si ah cun Jesuh nunzia le lam kan i nun pi ding a si.