Thawngtha bia Hmual

Thi luanhnak lam hrial in Daihnak lam fek tein aa thlaih i a nunnak in a langhter tu Mahatama Gandhi nun ning kan zoh tikah do tu tampi a rak ton hna i a nahchuah tu hna kut in a nun nak zong a liam mi a rak si.

Jusuh Khrih a zumtu hna le a hnu zultu hna zong nih an nunnak ah do tu hna tampi ton ding le harsat nak chungin nun-kal ding lam a si nak kong Bawipa nih ralrinnak a rak kan pek cia nak hi a si. Jesuh Khrih a zum i Khrihfa a hung si mi hna zong chungkhar lei kap in sish fale sinak in hlawt si nak le Khrihfa si ruangah rian ttha hmuh khawh lo, pek duh lo; Khrihfa si ruangah reng kai ter duh lo tbk,.. hna hi Laimi Khrihfa tampi in kan ton cio mi a si. Khrihfa timi min te hmah theih duh lo in ral hmuh in hmuh caan zong vawlei cung hmun tampi ah a um.

Messiah a rat tikah cun miphun dang hna hremnak le zohchuk nak in kan luat lai i daite in le hnangam nuam tein kan um kho tthan cang hna lai tiah ruah channak a rak ngei mi Israel miphun hna kha Jesuh Khrih nih: “Vawlei cungah hin daihnak tlunter awkah a ra, tiah ka ruat hlah u” tiah a cawnpiak nak a ngai mi hna kha faing tein a ti hna. Kaphnih har vainam nak in a har deuh mi a hmaan mi ba (thawngttha bia) in a cawnpiak hna tik ah a chimmi bia hrimhrim hi a fak tuk i nam sawh he aa lo mi a si ko. “Pathian bia cu a nung i a tthawng. Kap hnih har vainam nakin a haar deuh. Hlang lak in a cheu khawh, nunnak le thlarau an i tonnak tiang, hliahcang le thlik an i tonnak tiang a cheu khawh. Minung lungthin duhnak le ruahnak vialte kha  a hngalh dih”(Heb 4:12) tiah Hebrew catial tu pa nih a ti bangin a hmaanmi le a dikmi bia cu hlennak le hrokhrolnak a um nak hi vawlei cungah an cohlang kho lo. Cutikah a cohlang kho mi hna le a cohlang kho lo mi hna kar lak ah buaibainak a hung chuak i rual remnak le daihnak a tlau tawn.

“Kei ka pennak cu hi vawlei ta hi a si lo”(Jn 18:36) tiah Bawipa nih a chim bangin a kan pek hnga ding mi daihnak zong cu hi vawlei nih a kan pek mi daihnak he hin aa lo kho lo. Thawngttha bia vainam nih lungthin tiangin a pemh khawh lawngah thildik thilhmaan kan theih khawh, kan cohlaan khawh lai i kan nunnak ah Bawipa pek mi daihnak taktak cu kan hmuh khawh lai.