Ngaihchinhnak timi cu

Capernaum khuapi hi Galilee peng nithlak thlang lei ah a um mi  khua pakhat asi. Sianpahrang sinin nawl a ngei mi hna an tthut umnak khua le hmunhma zong a si caah biachim relnak lei in siseh a biapi ngai mi khua pakhat zong a si fawn. Galilee peng ah a um mi Capernaum khua hi  Jesuh Khrih nih thawngttha bia chimhram a rak thawknak hmun zong a si. Cun hmun dang khua hna nak in khua ruahhar thil hna zong a tambik a tuah nak hmun zong a si.

Kapernaum khua ah hin Rome ral bawipa sinum a damter nak hmun zong a si(Matt 8:5-13). Mipa a ihphah cung i a ih bu khan an thlak i cu pa zong a damter nak khua zong a si( Mk 1:1-13). Jesuh nih Bawi fapa pakhat a damter nak hmun zong a si(Jn 4:46-54) . Khuavang a ngeimi mipa a damter nak hmun zong a si(Mk 1:24-26). Jesuh nih Simon nupi nu a damter nak hmun zong a si(Mk 1:31). Cun hi Karpenaum khua ah hin Jesuh nih zawtfahnak a phunphun a damter hna nak hmun zong a si(Mk 1:34). Hi ka khua zongah hin Bawipa Jesuh nih “A thisa” kong a chim-phuannak hmun zong a si(Jn 6:59).

Thangttha bia a phuan mi si hna seh, khua ruahhar a tauh mi si hna seh, an zumh khawh lo ruangah le an i ngaichih khawh lo ruangah Sodom le Gamorah khua hna nak in fak deuh in biaceihnak an in lai nak kong zong a chim-phuan nak hmun zong a si(Jn 6:59).

Jesuh nih thawngttha bia a phuan mi cungah siseh, khua ruahhar a tuah mi hna cungah siseh, zumhnak ngei loin le ngaihchihnak an ngaih lo ruangah Sodom khua nak in hrawh an tong deuh lai tiah a ti bangin hrawhnak zong an rak tong taktak(Matt 11:23).

Thluachuah vel tampi in toih a si ko nain lehnak zeihmanh an ngeih lo caah hrawh an rak si. Pathian thluachuah le vel hmuh thiam lo cu mitcawt he lawh a si. Kan nun chungah hin Pathian sinah lawmhnak bia chim ding kan ngei zungzal ko hna. Ti thiang kan din khawh rih mi hna cungah siseh, thli thiang kan dawp khawh rih mi hna cungah siseh, Pa Pathian sinah lawmhnak bia chim zungzal hna u sih.

Fim thiam tein kan sual kan palh hna nak cungah i ngaihchih hna u sihlaw Pathian pekmi vel a lak siter loin nun thiam i zuam zungzal hna u sih.