Khuaruahhar thiamnak

Scientist pakhat nih vawlei tangin meikhua le meizik a chuah a hmuh tikah meihang chuah aa tim tiin a tuaktaan ko men lai. Sihmahsehlaw ngakchia pakhat nih cu thil a hmuh tikah a khua ruah a har lai i hi bantuk thil hi cu thil ti kho tu(Sertu) pakhat khat nih a sermi a si tiah a zumh ko lai.

“Maw ka Pa, van le vawlei a uktu, a fimmi le cathiammi hna sinin na thuhmi kha cathiam lomi hna sinah na langhter caah na cungah kaa lawm”(Matt 11:25) tiah Bawipa nih a ti.

Bawipa nih mifim thiam hna kha a miphun Israel mi hna hruaitu si dingah thiam hna loin, thih ttih ruangah Izipt siangpahrang kut in a zam mi, tuu le meheh cawngtu Moses kha a miphun hna hruaitu si ding caah a rak thim. Zeicah tiah cun, a alh hluahmah ko nain a kang lomi burbuk kha a zoh i Pathian thil ti khawhnak cungah ngakchia pakhat bangin khuaruahhar nak a ngei mi a si(Ex 3:1-12). “Ka hei naih deuh lai i ka hmuhmi thil khuarauhhar khi ka va zoh tuah lai” tiin cu thil a hmuh mi nih a lung a hnuh i burbuk chungin Pathian bia le kawhnak awthawng kha a theih.

Thomas Canlyle nih, “Khuaruahhar nak hi biaknak hram aa thawk nak a si” tiah a ti. Sermi thil hna zoh i khuaruahhar nak thawngin Pathian biaknak timi hi aa rak thawk mi a si. Kokek thil sining hna hi cafang in ttial lomi Pathian biathiang (Bible thiang) an si ko hna. Mifim mithiam hna nih an rel khawh lomi le zumh dingah an tlolh tawn mi kokek thil sining hna hi ngakchia tete nih an rel an theih khawh tawn. Cu ruangah cun Jesuh nih: “Nannih cu nan i thlen i ngakchia bantuk ah nan i can lo ahcun Vancung Pennak chungah nan lut bal lai lo”(Matt 18:3) tiah a ti nak zong hi a si. Thil sining tak hmuh thiam khawh le cohlaan khawh nak hnga ding caah ngakchia lungput(a thiang mi lungthin) ngeih a herh.

Khuaruahhar nak hi fimnak aa thawk nak a si tiah Socrates nih a rak ti. Phungthlukbia chungah: “Bawipa ttih cu fimnak hramthawknak a si, a thiang mi hngalh cu a thukmi thil hmuh khawhnak a si”(Proverbs 9:10) tiin kan hmuh. Bawipa sermi thil hna cungah kan khuarauhhar thiam hna u sih law, a thiang mi thil hna hngalh khawh i zuam hna u sih. Sermi thil hna thawngin Bawipa kha hmuh khawh i zuam hna u sih.