Sifak tarnu nih a kan cawnpiak mi

Hi tuanbia hi Mithiang Don Bosco a nun lio ah a rak hmuhton taktak mi tuanbia asi.

Nikhat ah kum 75 hrawng a si cang mi tarnu pakhat cu pumpak thlacamnak Biakinn te ah a rak ra i Don Bosco he bia i ruahttinak nawl kha a rak hal. Don Bosco nih cun tarnu hi a cozah sin asiloah aanaa a ngeitu pakhatkhat sin i va hmuhsak awkah tthohkhaannak caa hal ah a rat a si ttheu lai tiah a ruah. A ratnak sullam kha a vun kherhhlaih tikah tarnu nih cun, "A si lo, kei ka ratnak cu a dang kong ah a si." tiah a leh.

Don Bosco nih tarnu cu a baan in a hruai i a tthutter. Cun tarnu nih a bia cu a peh: "Keimah cu zei santlailo, a sifak ngai mi tarnu ka si ko. Ka hmette in a tu ka tar tiang, ka chan chung dihlak pawcawmnak caah har ngai in rian a `uan mi ka si. Fapa pakhatte ka rak ngei nain a tu ahcun a ka thihtak cang. Ka nunnak ah hin ka hmailei caan caah ti-in nun hnawhchan awk zeihmanh ka ngei ti lo. Rocotu dang zong ahohmanh ka ngei hna lo. Cucaah ka thih hlan ah hin ka fapa nih a rak ka cahtak bangin kaa khon mi ka ngeihchun phaisa tlawmpal hi dawtnak rianttuannak caah peek kan duh. Heh! hite hi a si - lire 100 (lire= Italy tangka rel), kum 50 chung rian ka ttuan i ka ngeih mi dihlak a si. Ka sii-ai thlopnak ah lire tlawmpal le ka ruak vuinak caah lire 15 cu kaa chiah rih ko. Tuzan cun hnangam tein ka it lai i hi hnu ni tlawmpal ah zeizong vialte cu aa lim cang ko lai."

Cu tikah Don Bosco nih a leh mi cu: "Na tuah mi pekchanhnak cu lunglawmhnak nganpi he kan cohlaan ko. Asi nain, hi phaisa hi na thih hlan chung cu ka hmang lai lo. Na herh a si ahcun zeitik caan paoh ah na rak laak tthan khawh. Nangmah phaisa a si rih ko lai."

"Cuti cun a si lai lo," tiah miding tarnu nih cun a al. Cun, "Hi ka tuah mi ahlu caah ka hmuhtawk a si mi laksawng cu ka hmuh cang ko. Phaisa cu hmang ko. Ka herh mi thil a um a va si le ahlu tu kan hal te ko lai. Cu kan hal mi na ka pek thawng cun laksawng na hmuh ve te lai. Ka zawt tikah na ka veh te kho hnga maw? tiah a ti.

"Kan rak in veh hrimhrim ko lai," tiah Don Bosco nih a leh ve.

A thaizing a hung phaan i Don Bosco cu, lungthiang ngai in ahlu a petu tarnu tuahsernak nih khan a lung a suk ngaingai i va len aa tim nain a umnak kha aa chingchiah kho lo. Cuti cun nihnih a rauh hnu ah khin a dang minu pakhat nih a rak auh i Don Bosco nih cun rianrang in a zulh colh.

Innkhaan chung a vun luh bak khin tarnu a si kha fiang tein a theih. Tarnu nih cun mithmai panhte le mirh bu-in "Ka herh mi zei-hmanh a um lo" tiah a hun ti.

Don Bosco nih cun, "A si kho lo, na herh tuk mi pakhatkhat cu a um hrimhrim ko lai. Culo ahcun mi cu na rak thlah bal hnga lo," a ti.

"A ttha, na chim bang cun a si hrim ko. Chiti Thiang thuhnak le hmanungbik Bawipa Thisa hmuh ka duh." tiah tarnu nih cun a leh. Cun tarnu cu hmanungbik Sacrament hna kha zumhfek le dutpat ngai in a cohlaan hnu in dai tein a thi.

Zeitluk in dah dawtnak rianttuannak ca i pek sian hi a tthat i khuaruahhar a si? Don Bosco nih mah kong he pehtlai in a chim tawn lengmang mi cu: "Bawipa nih amah a ttih mi cu a zohkhenh hna i a fek mi a dawtnak aa bochan mi cu him tein a umter hna. Thihnak chungin a khamh hna i mang`aam tlun caan ah a nunter hna. "[Ps. 33] hi a si.

By- Veronica