Dai tein um thiamnak

Dai tein um hi ttihnak  lungput ngeih ruangah a si lo. Ngamh san ruangah le teitu si ruangah dai tein um caan zong tampi a um tawn.

Nifatin kan um kal nak ah chimrelnak lei in siseh, tuah sernak lei in siseh, chikhat i dinh in dai tein um thiamnak caan kan kawl hrimhrim a herh. Cawlcangh-rianttuan peng lawngin teinak hmuh a si lo. A caan ah cun dai tein um thiam hi a herh tukmi zulhphung zong a si.

Nihin kan theih mi thawngttha bia (Matt 12:14-21)chung kan zoh tikah Jesuh nih a damter mi hna kha dai tein um awk ah bia a cah hna nak kong kan hmuh. Jesuh Khrih hrimhrim zong nih a thihnak hnga ding caah khua a khang tu hna kha zei ti hmanh in lehrulhnak a tuah bal hna lo. Hi tin Jesuh nih dai tein a um nak hi a sungh a pek hna nak si loin tei tu a si nak kha a langhter nak a si. Zeitluk in dah dai tein a um kan ti a si ah cun Calvary tlangpar ah thihnak a in tiang in a si. Cucu a sunghnak a si maw? Sinaisail lo. Pa Pathian nawl a ngai mi a si bangin “Dai tein” umnak thawngin Satan pennak vialte a tei dih cikcek khawh hna. Minung vialte hna khamhnak pek tthannak hnga ding caah a thih tiangin dai tein a um i, thihnak in a thawh tthan tikah thihnak kha a tei dih cikcek.

Nifatin kan nunnak ah midang cungah thazang hmangin le chawva hmangin teinak hmuh mi hna nak in dai tein um thiam hi daihnak a chuahter kho tu le teitu sinak a langhter tu a si deuh. Rem lonak a chuah tik caan ah i sik i velh tbt,… hna nak in dai tein um thiam khawh hi ral tthat deuh a si. A herh caan ah cun Jesuh Khrih bangin dai tein a um thiam mi si khawh i zuam cio ding a si.