Pathian chungkhar sinak

Sister nu pakhat he aa thei hngal ngai mi market ah thil a zuar mi nu pakhat nih sister nu kha “Zei ruangah dah nan nih hi nan min in auh hna loin sister tiah an in auh hna” tiah bia a hal. Cu tikah  sister nu nih “kan nih cu Jesuh Khrih a zum mi kan si bangin Khrih he ttafar kan si pin ah Jesuh Khrih thawngin midang hna he zong unau ttafar kan si tinak i theih hngalh zungzal nak hnga ding caah auh mi kan si. Kan vawlei pi zong hi inn pakhat bang a si bantukin hi innpi chungah a um mi vialte hna he zong unau ttafar kan si dih tinak a si ” tiin a leh.

Chungkhar sining lungput ngeih khawh lawngah Pathian chungkhar kan si kho lai. Nihin Bupi nih a kan thim piak mi cathiang (Matt 12:46-50) chungah Jesuh nih : “Vancung i a ummi ka Pa nih tuah hna seh ti a duhmi a tuahmi paoh cu, ka nau le ka far le ka nu an si ko” tiah a ti. Pa le Fapa timi biafang hrimhrim hi chungkhar pakhat ah hmanmi biafang a si. Pa Pathian nih a duh mi thil tuah lawngah Pathian chungkhar chungah telh kan si lai. “Pathian duh mi” thil hna cu zei hna khi dah an si hna hnga? Peter nih hi bangin a langhter: “Pathian nih thil ttha nan tuah kha a duh” (1Peter 2:15) tiah a ti. Mithiang Paul zong nih: “Tthat lonak kha tthat lonak in lehrul hlah u, sihmahsehlaw pakhat le pakhat cungah siseh, mi vialte cungah siseh, tthatnak tuah tu kha i tinh u. A zungzal in i lawm u, a zungzal in thlacam u, zeibantuk thil nan ton hmanh ah lunglawm in um u. Khrih Jesuh chung i nan nunning ah hin hitihin nung hna seh, tiah Pathian nih an duh hna”(1Thes 5:15-18) tiah a ti.

Cu asi caah lunglawm tein thil ttha a tuah mi le Pathian a thangtthat zungzal kho mi hna cu Jesuh khrih unau, Pathian chungkhar an si tinak zong a si. Hitin Jesuh Khrih he unau kan si khawhnak cu Jesuh Khrih hrimhrim nih a dawtnak thilsen in a kan tlenh caah a si.