Lu a ngeimi maw kan si a ngeilo mi dah?

Khuaruah satsai loin biachim a hmang mi hna le thil a tuah mi hna khi “Lu ngeilo; thluak ngeilo” tiah an ti tawn hna.

July 31, 2021 ni caah Bupi nih a kan thim piakmi cathiang cu (Matt 14: 1-12) hi a si.

Thluak a ngeilo, lu ngeilo mi hna ruangah tipil petu Johan thihnak a tuarmi hi kan nunnak lam fimchimtu dingah kan i chingchiah zungzal ding hrimhrim a si. Herodias fanu Salome aa dawhnak le a laam thiamnak cungah thil ning cang loin Herod nih “Na ka halmi paoh kan pek lai” tiah(Matt 14:7) chiatserh in bia a chim ruangah remh khawh tthan a si ti lomi biachahnak a tuah sual.

Chawva duh ruangah le lehrulh duhnak lungthin lawng te ngeih ruangah Herodias zong nih Johan lu tan ding tiangin a khuaruah thiamnak a tlau hna. Cun, ram cheukhat hmanh hal khawhnak nawl pek a si ko nain a nu chimmi lawng hruh ngaih in a ngai ve mi Salome daithlannak zong kan hmuh khawh ve.

Tipil petu Johan cu a lu tan a si ko nain, lu a ngeilo taktak mi hna cu Herod, Herodias le a fanu Salome hna hi an si. Theihthiamnak le ralrinnak kan i tleih peng lawngah lu he nung mi kan si kho cio hna lai.

Cawnpiaktu hna le hruaitu hna nih an chimmi bia hna zong hi ruah thiamnak lungthin he ttha tein kan ngeih hna lawngah kan nunlam ah dawnkhaantu tthatlo nak kan hrial khawh hna lai. Khuaruah satsai loin chimmi bia hna le tuahmi thil hna ruangah midang cungah ngaihchiat nak a chuahter tu hna kha hrial khawh i zuam zungzal hna u sih.

Pathian lawng hi fimnak hrampi a si caah ttihzahnak lungthin he a kan cawnpiaknak “Bible” Bia hna kha zulh khawh i zuam ding a si.