Dai tein na um thiam ve maw?

Nikhat ah tarpa pakhat a thilri chiahnak hmun (Kudawng) a thianh lio ah a suimilam(watch) a thlau sual. Cu suimilam cu midang caah cun suimilam sawhsawh a si tiah an ruah men ko lai. Sihmanhsehlaw, tarpa caah cun sunglawi ngai in a rak i chiah mi a rak si.

Cu suimilam cu a kudawng chung cun caan sau ngai a kawl cang nain a hmu kho hrimhrim lo, a tha a ba i a lung zong dongh lei a panh cang. Sihmanhsehlaw a suimilam te cu thlau thai ding a sian lo caah inn leng i lente aa celh lio mi ngakchia pawl kha a auh hna i, “Ka suimilam a hmu mi cu laksawng kan pek hna lai” tiah a ti hna.

Ngakchia pawl nih cun laksawng hmuh duh ah a kudawng chungum thilri kip kha an check dih, an kawl len ko nain an hmu kho ve lo. Caan sau nawn a rauh hnu ah ngakchia cheukhat cu an lung dong i kawl ti loin pakhat hnu pakhat leng an chuak i lente celh cu an peh tthan. Tarpa zong cu a hmuh ve ti lo caah kawl ti loin ngol hram aa thok i a kudawng cu ka khar lai tiah a hun i tim.

A kudawng ka khar lai tiah aa timh lio te ah ngakchia pakhat a sinah a ra i “keimah nih ka kawl rih ko lai, ka ngang rih ko” tiah a ti. Tarpa zong nih cun a suimilam cu a thlau lai ding a sian ve lo caah ngakchia pa cu “kawl rih ko” tiah a ti.

A rauh hlaan ah suimilam aa put mi ngakchia pa te cu kudawng chung cun a hung chuak i tarpa cu “heh, ka hmuh cang, mah hi a si maw?” tiah a ti. Tarpa cu aa nuam tuk i “ Ziah! mah tluk mi tam nih kan kawl le ko nain kan hmuh ttung lo, nang nih zeitin dah na kawl i na hmuh khawh ning a si” tiah a hal.

Ngakchia pa nih cun, “dai tein ka tthu i suimilam tung a kal thawng ka ngaih. Mah bantuk suimilam hi cu dai tein um i a tung nih a tuk mi aw te kha dai tein kan ngaih a si ah cun hmuh a fawi te ko” tiah a leh.

Tarpa cu aa lawm tuk i laksawng kan pek lai tiah bia aa rak kamh bang khan ngakchia pa te cu laksawng a pek.

Lungthin dai tein a um thiam mi hna cu hnawhsare in rian a ttuan mi hna nak in thil an tuaktaan kho deuh peng. Lungthin dai tein khua tuaktaan caan i pe ve u sih. Na pumsa zong a dam deuh lai i thildik-thilhmaan zong na theih na hmuh khawh deuh lai.