Ttih ding maw ttihlo ding dah?

Ttih phannak timi cu mikip nih nifatin kan ton cio mi a si. Thil tampi konglam he pehtlai in ttihphannak kan ngei cio.

Nihin ni caah bupi nih ruah tti dingin a kan thimpiak mi cathiang hna cu (Numbar 12:1-13; Matthew 14:22-36) an si. A huap in kan zoh a si ah cun voikhat nak Bible chungah Aron le Miriam nih Moses cu an thangchiat ruangah Pathian nih a sik hna. Pathian thimmi Moses cungah lungput ttha lo an ngeih tikah Miriam cu a thinghmui. Pathian thimmi hna cu ttih ding an si. Gospel chungah kan zoh a si ah cun, Bawipa ti cung a kal zultu hna nih an hmuh tikah “Mithla a si” tiah an ti i an thinphang i an ttih. Ttih lo ding a simi an Bawipa kha an ttihnak kong a si.

Zei bantuk thil hna hi dah kan ttih ding an si i zei bantuk thil hna kha dah ttih lo ding an si timi hi kan thleidan thiam an hau. Kan nunnak ah leng lei in tonmi harsat nak hna le kan tuah kan ttuan hnga ding a si hrimhrim mi hna hi kan ttih ding an si lo. Sihmanhsehlaw thil tthalo tuah le thil hmaan lo tuah buin thih ding tu hi kan ttih ding an si.

Minung  kan nunning hi ttha tein kan zoh, kan ngiat tikah a biktaling in kan si tawn. Ttih lo ding kha kan ttih i ttih ding tu kha ttih loin kan um tawn. Harnak kan tong sual hnga maw tiin kan i ruah cia hna i zeihmanh tuah ngam loin ttihlo ding kha kan ttih i sualnak tuah tu cu zei kan rel tawn lo.

Pathian Fapa Jesuh Khrih ti cung a kal zultu hna nih an hmuh tikah mithla a si tiah an ruah i an ttih. Khuachia a tthawl mi hna zong an hmuh bal ko. Khuaruahhar nak a tuah mi hna zong tampi an hmuh bal cang ko. Sihmanhsehlaw, ttihnak nih an mit a huh tikah mithla ah an rel peng ko rih.

Kan Bawipa Jesuh Khrih zong zeitluk in thil ttha a tuah an hmuh zongah a do tu Farasi mi an um bangin thil dik-thil hmaan a tuah mi hna cu midang nak in an lang khun i theih deuh mi an si caah dawnkhaan tu le hrawh ding aa timmi an um lengmang tawn. Sihmahsehlaw, ttih ding zeihmanh a um lo. Pathian duhnak a tuah mi hna cu Pathian nih a tthawnnak kut in a huhphenh zungzal ko hna.

Jesuh nih cun a thawh hna i, “Ka rawl cu a ka thlahtu duhnak zulh le a ka fialmi rian liim kha a si” (Jn 4:34)tiah a ti.