Siangbawi hna caah thla na cam bal maw?

Nihin August 4, 2021 ni ah Bupi nih mithiang John Mary Vianney puai ni a kan tuah piak i hi mithiang pa hi Bupi nih Diocesan Siangbawi pawl zohkhenhtu mithiang(Patron saint) tiah uapatnak zong a pek mi a si. Cuasicaah kan Laitlang um Siangbawi te hna puai ni zong a si caah kan Parish cio in siseh, a dangdang in a kan zohkhenhtu kan Siangbawi te hna caah a bik in thlacampiak cio hna u sih.

Nihin ni caah Bupi nih a kan thimpiak mi cathiang cu (Matt 15:21-28) a si. Canaan minu pakhat nih a fanu damter nak hnga ding caah Jesuh sinah a nawl nak kong kan hmuh. Jesuh nih a leh mi cu:

“Israel mi lak i a tlaumi tuu hna sin lawngah pei thlah ka si ko cu.”

“Ngakchia rawl cu i lak riangmang i uico pek cu a hmaan lo” tiah a leh.

Ramri khiah in pengkhat le pengkhat, hmunkhat le hmunkhat  kan i hlaat hna ruangah siseh, kan muisam ken ning kan i lawh cio lo caah siseh,  kan ramri khiahnak hmun ah a um lo mi hna kha ramdang mi, miphun dang tiah kan ti hna. Sihmanhsehlaw minung sinning le Pathian sermi, Pathian fa kan sinak ah cun kan i khat dih ko hna.

Pathian nih minung sining in a rak kan ser hmasat lio ah cun duh a nung tuk mi kan si ko hna. Sihmanhsehlaw, sualnak ruangah a kenkip ah kan i tthen i kan tlau hna. Hitin a kenkip a tlau mi Pathian fale hna hna Jesuh nih nihin ni ah a kan kawl cio mi cu kan si. Fale rawl a si mi Pathian veel le thluachuah, khamhnak hna kha a niambik ah hmuh mi uico(Satan) kha pek ding a si lo tiah Bawipa nih a kan ti duhnak a si.

Fa sinak in a tlau mi hna a kawl chuahmah mi Pathian rianttuan Siangbawi te hna caah fakpi thla kan campiak hna an hau. Fapa/nu tlau an kawl caan ah tihal thabat zongin an um kho. An tha zong a dih kho. Hliamhma zong an pu kho. Thih tiang a phanhter kho tu ttihnung ral hna zong an ton khawh caah thla campiak zungzal hna u sih.