Thawngthabia Mt. 16:13-23

“Jesuh cu Na Caah a Ho Dah a Si?”
2021 August 5 (Cacawn nili) ni thawngmha chimnak:
‘A zultu hna nih, “A cheu nih Tipil petu Johan a si, an in ti. A cheu nih, Elijah a si, an in ti, a cheu nih Jeremiah maw profet pakhatkhat dik a si, an in ti,” tiah an leh tikah Jesuh nih, “Nannih tah, aho a si nan ka ti dah?” tiah a hal hna.’

Hakha RVA in thawngmha a ngaitu Khrih ah dawtmi nu le pa, u le nau hna, Bawipa nih taksa thlarau ngandamnak le hnangam daihnak in pe cio ko hna seh tiin a hmasabik ah thla kan cam piak hna. A tu bantuk in kan boruak a mha lo caan te ah hin Bawi Jesuh cu kan caah a ho dah a si, kan nunnak ah zeiban tuk dir hmun ah kan chiah ti mi hna kha ruat mi in thlarau thazaang la i zuam hna u si tiah sawm kan duh hna. Hmasa ah Pathian bia thiang a si mi Bible relnak kan ngei rih hna lai. 

Matthai 16: 13-23 
Jesuh cu Sisaria Filipi khua pawng ram ah khan a va kal i a zultu  hna cu, “Mi nih Mi Fapa hi aho a si, an ka ti dah?” tiah a hal  hna. Annih nih, “A cheu nih Tipil petu Johan a si, an in ti. A cheu  nih, Elijah a si, an in ti, a cheu nih Jeremiah maw profet  pakhatkhat dik a si, an in ti,” tiah an leh.  Cun a thawh hna i, “Nannih tah, aho a si nan ka ti dah?” tiah a hal hna. Simon Peter nih a leh i, “A Nungmi Pathian Fapa, Messiah kha na si,” tiah a ti.  Jesuh nih cun, “Johan fapa Simon, mi vanmha ngaingai na si!  Zeicahtiah hi biatak cu minung sinin na hngalhmi a si lo i vancung i a ummi ka Pa nih an pekmi a si. Cucaah cun nang cu lung tum, Peter, na si, kan ti. Cun hi lungpi cungah hin ka Khrihfabu hram ka bunh lai i cucu thihnak hmanh nih a tei kho lai lo. Vancung Pennak hunnak tawhfung cu kan pek lai i vawlei cung i na hrenhmi cu vancung zongah hrenh a si lai i vawlei cung i na awnhmi cu vancung zongah awnh a si lai,” tiah a ti. Cun Jesuh nih Messiah a si cu ahohmanh chim hna hlah u, tiah a thlauh hna. Cu caan thawk cun Jesuh nih a zultu hna cu, “Jerusalem ah ka kal lai i upa hna le tlangbawi ngan upa pawl hna le Phungbia cawnpiaktu saya hna nih harnak tampi an ka pek lai. An ka thah lai i ni thum ni ah nunter mhan ka si lai,” tiah fiang tein a chimh hna. Peter nih a dang deuh ah khin a hei i kalpi i a mawhchiat.  “Bawipa, hi thil cu Pathian nih na cungah tlunter sawh hlah seh,” tiah a ti. Jesuh cu a hun i mer i Peter cu, “Satan, ka sinah um hlah. Na ruahnak hi Pathian ruahnak si loin minung ruahnak a si caah ka caah dawntu na si,” tiah a ti.
(Bawipa Thawngmhabia asi.)

        Nihin kan relmi Gospel chungah hin chim awk le ruahawk tampi a um i; mah chung in nihin ah hi bantuk in kan boruak a mha lo caan te ah hin Bawi Jesuh cu kan caah a ho dah a si, kan nunnak ah zeiban tuk dir hmun ah kan chiah, asiloah harnak kan ton tikah Khrihfa kan sinak nih zei tal a kan bawm kho maw, hnangamnak a kan pe kho maw? ti ban tuk hna kha ruat mhan u si. 

        Bawi Jesuh nih a zultu hna cu, “Mi nih Mi Fapa hi aho a si, an ka ti dah?” tiah hmasa ah a hal hna. Atu i kan rel ban tuk in minih an ruahnak kong kha a zultu hna nih an chim tikah a zultu hna le kan mah ca zongah a biapi deuh mi bia kha a hal hna. ”Nannih tah, aho a si nan ka ti dah?” tihi a si. Jesuh hi a hodah a si tihi kannih chan ah cun Bible zong kan ngei minih an chimmi zong tampi kan thei cang tikah chim hi a fawi te cang tiseh law a palh lai lo tiah ka ruah. Messiah a sinak, Pathian fa a sihnak, khamhtu pa a sihnak tibantuk le Pathian a sihnak tiang in kan Bible thawngin kan  thei khawh cang. Zultu Peter nih “A Nungmi Pathian Fapa, Messiah kha na si,” a ti lio ah khan kan mah bantuk in fawi tuk in chim khawh a si lo. Minih Jesuh kha Messiah asiloah Khrih a sinak kha an hngalh rih lo lio kha a si. Mah lio ah khan Peter nih nangmah cu a Nungmi Pathain Fapa, Messiah kha na si a rak ti.

        Cun Peter nih Jesuh kha Messiah nasi a rak timi hi sullam a ngei tuk. Zeiruangah kan ti a siah cun Jew miphun hna i an hngah lengmang mi, an bochan mi, le an ruahchannak cu Messiah a ra te lai ti hi asi. Cucaah Peter nih Messiah na si a tinak cu ‘nang cu kan hngah lengmang mi, a kan khamh tu ding, kan bochan mi kan ruahchannak na si’ ti nak a si. John 6 chung i sing-khaw-hmuh ngan pi kha hei ruat mhan u si. Bawipa nih zungzal nunnak ngahnak caah a Thisa ei le din a herh nak kong a chim tikah, minung tampi cu an lung a dongh, a si kho lo tiah Bawipa an kal tak dih lio zong ah Peter nih zei dah a ti? “Bawipa, a ho sinah dah kan kal hnga? Zungzal nunnak bia a ngeitu cu nangmah pei na si cu. Atu cu nangmah hi Pathian sinin a rami Mi Thiang na si kha kan zumh i kan hngalh cang,” tiah a rak ti. Mi tampi cu an lung dongh in Bawipa an kal tak lio ah Peter le zultu dang hna cu Bawipa nangmah lo cun a si kho lo, minih a si kho lo an ti zongah, minih an zum lo zongah kan ni nih kan zum tiah lung dongh lo te in Bawipa kha an zul hna.

        Peter nih Messiah na si a timi cu Bawipa Nang cu kan ruahchannak, kan zeizong vialte na kut chung ah a um, nang lo cun a si kho lo tinak a si. Dawtmi nu le pa, u le nau hna, a tu bantuk in harnak kan ton lio caan ah Bawi Jesuh cu kan caah zeidah a si. Kan lung a dongh ve sual maw? Ruahchannak ngei lo in kan um sual maw? Minih Messiah a si ti ruang i Messiah a si ti ve sawhsawh tu si lo in Bawipa cu ka ruahchannak, ka hnangamnak a si ti bak in lungthin taktak in a hngalh tu si kan herh. Bawipa nih thlua in chuah se law hnangam daihnak in pe ko hna seh. 

Fr. Peter Lal Zin Thang (Hakha Diocese)