Jesuh Bia ngaih cu Dawhnak a si

Nihin cu bupi nih kan Bawipa Jesuh Khrih a muisam aa thlennak puai a kan tuah piak. Nihin ni caah bupi nih a kan thimpiak mi cathiang hna cu (Daniel 7:9-10,13-14; 2Peter 1:16-19; Mark 9:2-10) an si.

Zultu hna caah siseh, zultu hna nih pehzulh in an phuanmi Jesuh Khrih thawngttha bia a zum i a cohlaang mi Khrihfa vialte hna caah siseh, kan Bawipa a muisam aa thlennak kong hi a biapi tuk mi a si. Jesuh nih Peter, James le Johan a thim hna i tlang cungah a kai pi hna nak hi Pa Pathian nih a duh mi cu zeidah a si timi an hngalh nak hnga ding caah a si. “Hihi ka dawtmi ka Fapa a si, a bia kha ngai u”(Mk 9:7). Pa Pathian nih tuah hna seh tiah a kan duh mi cu a Fapa bia kha ngaih ding a si. Pa, Fapa le Thiang Thlarau Pathian cu pakhat an si. Pa Pathian bia ngaih cu Fapa bia ngaih a si bangin Fapa bia ngaih cu Thiang Thlarau Pathian nih a hruai i a cohlaan ter mi hna lawng nih an ngaih khawh.

Pa Pathian nih Adam le Eve kha tuah lo ding “ei lo ding” ralrinnak a rak pek ko hna nain an zulh lo caah Pathian he aa lomi “Muisam” a rak tlau. Pathian he aa lomi Muisam kan ngeih khawh tthan nak hnga ding caah Fapa Pathian, Jesuh bia ngaih dingin nihin ni ah bupi nih ralrin bia a kan chimh tthan.

Peter, James le Johan nih vancung muisam, Pathian he aa lomi muisam an hmuh tikah an thin a phang i zei chim awk hngal loin an um. Jesuh cu a lungthin aa dawh pengmi a si caah Peter le a hawi le nih an hmuh mi leng lei muisam zong aa dawh dih cikcek.

Nihin Pa Pathian nih a kan fial bantuk in Jesuh bia kan ngaih a si ah cun Jesuh bangin kan lungthin aa dawh ve lai i, leng lei in a lang mi kan muisam tiangin aa dawh ve ko lai.