Pathian chaw zeitin dah kan pek cio?

Jews miphun hna nih Jerusalem biakinn pi lawng hi raithawi pekchanhnak caah an i ngeih mi biakinn a si. Bible cathiang chung i kan hmuh mi a dang hmunhma hna i cu Pathian bia an i cawnpiak nak le thlacamnak an hman ttinak hmun lawng a si. Cuasicaah kum fatin an biakinn humhimnak ding caah le kilkawi nak ding caah tangka tampi an herh lengmang. Zeicah tiah cun nifatin raithawinak i pekchanh ding caah tuu siseh, sathau siseh, a dangdang pekchanhnak tuah nak ding caah tangka tampi an herh lengmang caah a si.

Biakinn caah hitin a herhbau mi a tamtuk caah kum 20 a tling cangmi paohpaoh nih biakinn caah pek ding a si mi paoh kha pek a si nak kong Exodus 30:13 ah fiang tein a langhter; “Milu relnak ah aa telmi paoh nih cun, pek awk a simi zat kha an pek hrimhrim awk a si lai i biakinn i hmanmi cuaithlainak in pekmi cu thlai an si lai. cu an pekmi cu Bawipa sin pekmi laksawng a si lai” tiah a ti. Cuasicaah ngun tangka pia 2, nihnih rianttuan man hi kum fatin pek a si.

Nihin bupi nih a kan thimpiakmi cathiang (Matt 17:22-27) chung kan relmi ah “Nan sayapa nih biakinn ngunkhuai a pe bal maw?” tiah Peter kha an hal i Jesuh nih ngunkhuai a peknak kong kan hmuh. Zeicah kan ti a si ah cun Pathian sinin kan hmuh mi thluachuah hna chung in Pathian kan pek tthan a si ah cun thluachuah tam chinchin hmuh a si nak kong kha a kan cawnpiak duh caah a si.

Pathian sinin kan hmuh mi nunnak, thiamnak, dawtnak, tthatnak hna kha Pathian sinah fel tein kan pe tthan bal cio hna maw?