Zumhnak man cu..

Bawipa nih bia a kan kamh mi hi zeitik hmanh ah a hlaw ballo. Bia aa kam bangin a kan tlinh piak zungzal ko. Bawipa biakamnak hna a tlin hnaan ah cun Pathian programe hrawh awkah aa zuam zungzal mi Satan nih hrawh ding le kham aa timh zungzal caah a caan ah cun kan ruah tawn lomi dawnkhaan tu tete hi an hung chuak thiam tawn. Sihmanhsehlaw a donghnak ah cun teitu cu Pathian a si zungzal ko.

Nihin kan relmi cathiang (Matt 20:1-16) chung kan zoh tikah dum ngeitu nih a dum chung rianttuan awk ah minung hna a hlaan hna nak kong kan hmuh. Rianttuan tu hna zong nih tangka zeizat na kan pek lawngah kan ttuan lai timi bia pakhat hmanh an chim lo zong kan hmuh khawh. Dum ngeitu he hnatlak nak an ngeih cia mi lawng kan hmuh.

Hmanungbik thlahmi rianttuan tu si hna seh, zing tein a ttuan mi si hna seh aa tluk cio in ttuan man cu phalh an si hna. Rianttuan tu hna zong nih man phalh in rian a kan ttuan termi a si ti an theih an zumh bangin an zumh ning cio in a man cu an hmuh dih taktak.

Kan nih pakhat cio hna zong Pathian nih a kan fialmi rian, zumhnak he fel tein kan ttuan, kan tlinh ve a si ah cun Pathian nih bia a kan kamh bangin laksawng “zungzal nunnuamhnak” laksawng a kan pek ve ko lai. Pathian cungah zumhtlak tein le fel tein nung cio hna u sih. A rian thiang ttha tein ttuan cio hna u sih.