Vancung ram caah a herhmi hnipuan…

"An sawmmi hna va zoh awkah khan siangpahrang cu a vung lut i nupi tthitnak puan aa aih lo mi pakhat a hmuh. Siangpahrang nih cun, 'Ka kawi, zeitindah hika ah hin upi tthitnak puan loin na luh zia," tiah a hal. (Matt 22:11-12)

Minung cu a sual a palh thiammi le thazang a dermi kan si. Kan thazang dernak hna le kan sual nak hna cu Pathian hmai ah thuh khawh hrimhrim an si lo.

Hi kong he pehtlai in nihin cathiang kan relmi (Matt 22:1-14) chungah fiang tein kan hmuh khawh. Bianabia chungah hmanmi Siangpahrang pa bangin Pathian nih cun kan i tlak lo buin a kan dawt tuk hringhran caah vancung Pennak kan co nak hnga ding caah a kan sawm cio. Tthitumhnak puai pi chungah cun “a chia a ttha thlulo in” an luhter ko hna i rawl danghnak khaan cu minung in an khah ter bangin, hmanungbik ni ah Pathian nih a vanmi hna a thlah hna lai i a hmai ah khat tein kan phan cio vet e hna lai. Rawl danghnak khaan chungah minung tampi an um ko. Sihmanhsehlaw minung pakhat cu a dang tein langhter a si i rawl danghnak khaan chungin leng ah chuahter a si zong kan hmuh.

Bawipa nih a kan cawnpiak duh mi cu “minung cu pakhat le pakhat i hlen khwah a si ko men lai; sihmahsehlaw Pathian cu hlen khawh a si lo” nak kha a langhter duh mi a si.  Bawipa nih a Pennak chung luh ding ah a kan sawm dih cio ko. Sihmahsehlaw  “nupi tthitnak puan loin a lut mipa” bangin Pathian hmai ah tthatnak puan, dawtnak puan, Pathian duhmi nunzia dawhnak puan kan i aih ve lo a si ah cun Vancung Pennak kan co kho lai lo.

Cuasicaah thilpuan he aa lomi Pathian duhmi nunzia dawh he nun, lungthin tak tein midang caah tthatnak tuah , innpa chakthlang dawtnak,  Pathian bia thiang cawnpiak ning in kan nun a si ah cun Pathian nih a Pennak Vanram ah a kan cohlaan ko lai.