Dawtnak caah Dawtnak(2)

Sernak kong he pehtlai in a kan hmuhsak. Sernak cu Pathian i a donglo mi dawtnak in a hung luang i donghnak ngeilo dawtnak a si. Pathian nih amah le amah aa dawt i cu dawtnak in siseh, sermi thil vialte kha a dawtnak in siseh, kanmah cu a kan ser. A sermi thil vialte kha a dawtnak le a zangfah nak in khahter a duh caah a sermi a si, Kanmah kan si le kan um hi Pathian a tthatnak ruang lawng ah a si ko.

Jesuh nih Kalvari tlang cungah caanttha pahnih kha a thisen dihlak thlet in a cawk cang. A ttuanvo cu sualnak a ngei i aa tlaak lo mi kanmah dawt kha a si. Kannih nih a thuktuk mi sifah retheihnak rili chungin kan dawt ve awk a si. Kan Pathian i a lianngan nak hna kha kan ruah awk a si. Pathian a dinnak le a zangfahnak chungah dawtnak kha kan langhter awk a si. Bia cu minung ah a cang i khuaruahhar biathuk hna cu a rak chuahpi. Bethlehem, Nazareth, Gethsemani dum, Kalvary tlang, Bawipa Thisa Sacrament hna cu chim khawhlo in a thuktuk hringhran mi Bawipa i dawtnak le zangfahnak an si.

Bawipa Pathian a nunnak cu hi vawlei cungah kum sawm thum a si. A nunnak cu nawl ngaihnak, sifahnak le a daimi nunnak ah amah le amah lang hngal lo in a um.

Gethsemani dum ah sifah temhinnak fakpi in a in hnu ah tungah hri in an hren i `ih a nung tukmi tuk velhnak, hling luchin chinhnak, Kalvary tlang cungah thihnak tiang kha a in. A kut le a ke vialte hmapu dingin a tuahtu hna kha dawtnak zangfahnak in a zoh hna. Ahma hna cu vancung ram luhnak innka an si, hma a put tertu hna caah a si. 'Maw ka Pa, an sualnak kha rak ngaithiam ko hna. Annih nih zei kan tuah ti kha an i hngal lo" (Lk. 23:34) tiah a rak ti.

Pathian caah aa lawmhnak nganbik cu kan sualnak ngaih thiam kha a si.