KHUARUAHHAR MINUNG BIA LE HMURKA

Minung cu caan a um chung poh bia kan chim i kan holh. A tthami bia he a tthalomi bia he kan chim “Bia” timi biafang cu sawhsawh te a si ko na-in khuaruahhar ngai mi zong a si. A thlum a nem i hnemhnak zong a pek khawh bantuk in huatnak lungfahnak le thinhunnak zong a chuahter khawh.
Zeicahtiahcun kan chimmi bia le hmurka ah hmual ngeihnak a um i power zong a ngei. Uktu Bawi, Saza, Upa, Nu le Pa chimmi bia le hmurka cung lawng ah hmual a ngei i power a ngei lo. Hngakchia bia zong ah hmual le power a um ve. A ti a haalmi ngakchia te nih “ti hung ka pe” a ti ahcun ahodah mah ngakchia bia cu ngeih loin a um kho lai. Asiloah ngakchia te nih “Kapa le kanu nan ngandam seh, kan dawttuk hna” tiah a ti ahcun a hodah lunglawmh loin a um kho hnga. Cu bantuk si lo in “saar thih in va thi uh” tiah ti sehlaw ahodah a ing kho lai. Biatak kan ti ahcun ngakchia bia nih a theitu nu le pa i, an taksa le an pum kha a va tonghmi a si lo. Asiah mi pakhat nih a chimmi Bia cu zeiruang ah midang pakhat kha lunglawmhnak asiloah lungfahnak a si ter? Zeicahdah mi pakhat nih a chimmi bia hi mahtluk in hmual a ngeih hnga?
Minung cu Pathian nih amah he aa lo in a kan ser tiah Bible chungah kan theih. Pathian nih van le vawlei a ser lio zong ah hriamnam hmanlo in a ka in a chuakmi “Bia” in a rak ser (Gen 1:3). Cu bantuk tthiamtthiam in kannih minung zong kan hmur kaa kan hman i kan ‘Bia’ in kan paw cawmnak nunnak caah kan hman. Minung kan nunnak ah dawtnak, chawleh thalnak, fimthiamnak, uknak lei nawlngeihnak thok-in rianttuannak pawcawmnak, nunnak vialte ah ‘Bia’ tello in a si kho lo. Kan hriamnam `habik a si zungzal. Bia in kan duhmi thil vialte kan ttuan kan tuah. Chawleh thalnak a tuahmi (Sipuazi) pawl chinchin cu Bia`ha tampi chim a herh. An chimmi bia zong a ngaitu a theitu lung nuamhternak hawi komhnak caah a si.
Vancung mi a cheu cu Pathian pekmi nawlngeihnak cungah an ruam a kai i Pathian an doh caah Seitan (khuachia) pawl ah an ni cang. Asinain Pathian nih Seitan (khuachia) hna cu a pek cia mi nawlngeihnak kha a lak tthan, a chut tthan lo ti kha khamhnak tuanbia chungah kan hmuh. Cu bantuk in minung zong zeitluk in sual hmanh uhsihlaw Pathian nih a kan pek cia mi nawlngeihnak, minung si man kha a kan lakpiak tthan lo. Cu caah minung cu upa, ngakchia ti lo, murum misifak ti lo, minung vialte nih Pathian pek mi nawlngeihnak minung si man kan ngei cio. Cucaah minung cu a hopoah kan dihlak in huham kan ngei dih. Kan huham ngeihnak cu kan Bia le Hmurka in a lang bik.
Minung cu Pathian pekmi huham le nawlngeihnak kha a tlawmte in siseh, a tampi in siseh hmualngei lo tein siseh, hmualngei ngai in siseh ‘Bia le hmurka’ in nifatin a caan a um chung kan hman cio dih. Ngakchia te nih ‘ti hung ka pe’ tiah a ti mi zong cu a nawl ngeihnak kha bia in a chuahter mi a si. ‘Saarthih in va thi’ a ti zongah nawlngeinak kha a chuah ve mi a si. Biattha cu tthatnak lei ah a hmual a ngeih bantuk in bia tthalo cu tthatlonak lei ah hmual a ngei ve i kan mah sin ah a kir tthan kho.
Minung cu Bia le hmurka in kan nunnak caah kan hman bik kan ti khawh. Bia tthalo chim cu kan thlarau lawng si loin a tu kan nunchung zongah tthatlonak a chuahpi. Biattha le hmur kaa ttha cu hawikom tampi ngeihnak, dawtu tampi ngeihnak, tthanchonak zong a si. Cucaah minung cu zeitik hmanhah, zeiruang hmanhah, biatthalo chimlo awk le mi volhpamh, chiatserh bia pawl chim hrimhrim lo awk a si. A zungzal in ngeih nuam le biattha mi lawng chim ding a si. A bik in thlacam le mi thluachuah pek, biattha le ngeih nuam mi bia lawng chim awk ah i zuam cio u sih.

Cattial tu /- Agnes