BAWIPA ZANRIAH

Lairam R.C Khrihfa bu ah hin Bawi Jesuh bia ah lungtling lo mi kan um rih. Cucaah hin an lung a fiang deuh hnga maw tiah hi tahchunnak pakhat hi ka lak mi a si. Market ah satit a ttha ngaimi kan cawk i cu sa cu mei cungah kan vun pherh. Cu tikah satit chung cun a thi a rak chuak i umchin cungah a tla. Sa chungah thi aa tel ko caah kan lung a tlin awk a si ko lo maw. Micheu cu Siangbawi te nih mi surhang cu an din i kan nih cu an kan pe lo an ti hoi. Unau careltu hna Jesuh nih “Ka sa a ei i ka thi a dingmi poh nih zungzal nunnak an ngei i hmanungbik ni ah ka thawhter te hna lai a ti” (Jn. 6:54).
A sa kan ei poh ahcun a thi aa tel ko. Lung awttawm awk a si lo. Lung awttawm in na um rih ahcun Bawi Jesuh na zum lo a si ko lai. Mt. 7:21 “Bawipa, Bawipa a ti mi kip nih vancung an phan lai lo. Vancung khua i a um mi Pa duhnak a tuah mi lawng nih an co lai”. Cu caah a si a ti mi cu a si tiah zum ko. Zakhat ah zakhat tu zum a hau. Cucu zumhnak tling kan ti mi cu a si.
Laimi kan Pathian biakning ah hin Bible ca lawng lawng hi bia chimnak ah kan hman bik. Kan chim poh ah Nawlbia a herh lo Bible ning tu in kan nun a herh an ti mi a tam ngaingai. Hlan lio zultu hna le Bawi Jesuh kha biafang hmang in khuakip ah thawngttha an rak chim ko ti kha kan hmuh.
Gospel hi A.D 42 in 97 ah an rak ttial ko. Lamkaltu hna nih A.D 100 ah an rak ttial ko nain an rak hmang kho lo. Zeicahtiah Khrihfa hremnak a um ruang ah a si. A.D 300 hnu ah Khrihfa bu hna cu Pathian biaknak an ngei tthan i ca an rak ttial cio mi kha ramkip ah an rak khawmh tthan. Cu hmanh ahcun an hmang hlei lo i Hippo Khongsizung ah an rak fim tthan dih ko nain zultu hna nih Jesuh thawng`ha cu ziaza le an nuncan in an rak langhter i thawngttha cu an rak phuan lengmang i A.D 1500 hnu lawng ah mipi nih Bible ca cu an rak hman. R.C bupi cu bible a ttialtu le a ngeitu, a zultu a si. Vawleicung fimthiamnak a karh bantuk in bupi dohtu tampi an rak chuak i, Pathian duhning le bible ning in si lo in anmah duhning in bible kha an rak leh an rak kalpi i buthar an ser. Mipi nih cauk kan hmannak cu kum 500 fai lawng a si rih ko. Careltu hna ruat ve hmanh Bible hi Pathian Dairi cauk ti khawh a si ko ka ti. Ruat ve law na thil timi le na rianttuan mi kong na ttial ve tawn ko kha. Cu ve bang Jesuh nih zultu pawl kha phungbia in a rak hruai hna i a hmuhsak mi hna cu mithi thawhternak, khuavang a chuahnak, khuaruahhar a phunphun a tuahnak khan Pathian fa a sinak kha a hmuhsak hna i mah vialte kha an rak ttial cio mi cauk a si.
Kha a si ahcun nihin R.C bu hna nih Pathian an biak mi hi Bible ning te a si lengah Jesuh nih a rak fialmi hna phungbia an si fawn. Asi kun ah nihin Khrihfa ka si an ti dih cio fawn ko nain Jesuh nih a fial mi hna lamkaltu nih an dirpi mi bu hi an duh fawn ttunglo mi hi zumtu dirhmun hmaan kan ti kho hnga maw. Nihin thawngttha chimtu an tam ngai cang. Mi cheukhat cu Kalvari dikari kanlak poh ahcun a za ko. Sianginn dikari a herh lo an ti asina-in a tu cu lucan an duh tthan cang i asang sangah sianginn an kai `han cang. Hi hoi hna hi Kalati 1:8 ah “Kanmah kan si zongah vancungmi an si zongah kan-in chimmi hna thawngttha he a dangmi thawngttha a chimmi hna cu Hell ah tla ko hna seh” a ti. Hi cacaang nih a sawhmi kan si sual hnga maw. Na sining tthate in i chek a hau cang. Biatak tu kawl cang uh sih.

Catial tu/- Pu Dar Hnin