JESUH RAWITU JUDAH

Nikhat ah ‘Kerioth’ timi khua ah bawhte pakhat an hrin i, a nu le a pa nih ‘Praise’ ti in a min an rak pek. Cu lio ahcun ‘Bethlehem’ khua ah Bawhte pakhat an hrin ve i a min ah ‘Savier’ ‘Khamhtu’ tiah an rak sak ve. Kum saupi a rauh hnu ah Bethlehem bawhte nih Kerioth bawhte cu a ton i a hnu zul ding ah a auh i a min ah ‘Judah’ a sak.
Bawi Jesuh zultu pawl hi an dihlak ti awk in ‘Galili’ mi deuh an si. Asinain Judah tu cu ‘Judia’ mi a si. Judah cu phaisa tlaih a thiambik a si caah a zultu hna lakah phaisa kengtu a rak si.
Zeiruang ah dah Judah nih Jesuh a rawi? A rawinak sullam Pathum a um ti a si.
(1) Judah hi a hak a kauh tuk caah a si kho men. Zeicahtiah cun, Bethany khua, Lazaru inn ah Mary nih Bawi Jesuh ke kha zihmui in a tawihpiak lio ah khan, Judah nih cun, a pamtuk lo maw? Zihmui hi kan zuar ahcun mi pakhat i zarhkhat chung a rian`uan man he aa tluk mi phaisa kan hmu hnga lo maw? Cu phaisa cun mi sifak kan bawmh hna ahcun a `ha deuh lo maw? tiah a rak ti. Jesuh nih(Jn. 12:6) chungah Judah cu ‘Phaisa khonnak thing kuang in phaisa firtu a si’ a ti. Cu thawkte in Judah nih Jesuh cungah a thin a hung cang ti a si.
Judah nih Judah tlangbawi pawl sin in Jesuh rawinak man ah a rak halmi hna cu an chan lio phaisa relning in cun (arguria) sawmthum a si i ‘argurio’ pakhat cu ‘Shekel’ pakhat a rak si. Shekel pakhat cu Shillong pathum he a tluk. Atu chan phaisa dollarnak in a sang deuhmi a si caah a tu kanmah phaisa hin cun ks. 6000 hrawng a si hnga. Cu caah Judah nih Bawi Jesuh kha ks. 6000 in a rak zuar.
(2) Judah nih Bawi Jesuh a huat caah a si kho rih. Zeicahtiah cun, mah lio caan ah Jew miphun cu Rom cozah kuttang ah an rak um i, Rom cozah dotu dingah hruaitu le uktu an herh liote a si. Judah nih Jesuh hnu a rak zulh mi zong hi, Jesuh nih khuaruahhar thil a tuahnak in Rom cozah hi a do `heu te lai tiah a rak ruah zongah a si kho rih. Asinain Jesuh cu Judah ruahning bantuk in si loin, ‘Vailam cungah thahnak ka in lai,’ tiah Jesuh nih a rak chimchung tikah a huat chin chin zong a si kho rih ve.
(3) Judah nih Jesuh hnu a rak zulh lio ah hin Jesuh tuah mi khuaruahhar thil a phunphun, mithi a thawhter mi hna, mizaw a damter mi hna,... etc... mah viatte kha a rak hmuh tikah, Jesuh hi cu zeitik hmanh ah an that kho bal lai lo, amah le a mah aa khamh ko lai, tiah a ruah caah a rak rawinak a si kho ve.
Cu caah, Judah nih zei ruangah dah Jesuh a rawi kan ti ahcun, a pathumnak hi a si kho bik.
Zeicahtiah cun, Gesmani dum ah Jesuh tlaihding in palik pawl a kalpi hna lio ah khan, Judah nih ‘Ka hnamh mi pa nan tlaih lai,’ a ti hna. Greek holh in (philein) ti mi cu hnamh sawhsawh men a si i (Kalaphilein) ti mi cu nungak tlangval aa duh mi hnamh le aa daw ngaingai mi hna i hnamh i an hman mi a si. Judah nih Bawi Jesus a hnamh ti mi ah Bible ca nih a hman mi cu (Kalaphilein) a si. Cu caah cun Judah nih Bawi Jesuh a rak hnamh mi hi palik pawl theihter ding sawhsawh a si lo. Zeicah kan ti a si ahcun, Judah tlangbawi pawl nih Jesuh tlaih ding ah an fial hna mi palik pawl cu a dang si loin Biakinn hngaktu palik pawl an si. Mah palik pawl nih Jesuh cu voi tampi an hmuh bal ko lai, Jesuh nih Biakinn chung i capuai vialte a rak leh dih lio ah siseh, Jesuh nih a rak cawnpiak hna lio ah siseh, an hmuh an theih ko lai. Cu caah cun, Judah nih Jesuh a hnamh mi hnamhnak cu dawtu taktak an i tthen lai i an hnamh mi hnamhnak arak si deuh. Gesmani dum i Judah le Jesuh an i hnamh mi cu a donghnak a si ko.
Jesuh vailam tung a put lio vialte kha Judah nih a thli tein a rak zoh len ko. Zeitikah dah Jesuh nih Khuaruahhar thil a tuah lai i amah le amah aa khamh lai i ralkap pawl a thahdih hna lai, ti kha a rak bawh ko. Asinain Jesuh cu zei bantuk khuaruahhar lianngan thil hmanh tuah loin a thih tikah, Judah cu zei tuah awk a hngal ti lo. Kei ka palh ko cang a ti i Judah tlangbawi pawl sinah va kal `han in an hmai ah phaisa a va hlonh tak. Cu hnu cun a kal i amah le amah hri in aa awk i a thi.

Judah tlangbawi pawl nih Judah a hlonhtak mi phaisa cu an laak ko nain, a thianglo mi phaisa a si caah, mi `halo le saar thih in a thi mi pawl phumnak ding thlaanhmun pakhat kha Jerusalem khua ah an rak cawk.
Cattial tu/- Hrang Cung (phete)