MISSA RAITHAWINAK CU PA PATHIAN, JESUH KHRIH, BUPI, PUMPAK LE VAWLEI HE AA PEHTLAI (1)

Missa raithawinak timi cu kannih vialte Pa Pathian, Jesuh Khrih, Bupi, Pumpak cio le Vawlei he kan i peh tlaihnak kha ttha tein kan theih hnu lawngah missa raithawinak sullam kha fiang tein kan theih khawh lai.

(A) MISSA RAITHAWINAK CHUNGAH PATHIAN HE KAN I PEHTLAIHNAK.
(i) Vawlei a umnak sullam cu, sermi thil vialte hna nih Pathian a tthat tlinnak kha langhter in Pathian a liannganak le sunparnak kha thangtthat awkah a si. Cu thangtthatnak ding caah biakning (Liturgy) nih tampi a kan bawmh.
Zeitindah biaknak nih a kan bawmh kan ti ahcun, Pa Pathian, Fapa Pathian, Thiang Thlarau Pathian he hmunkhat ah fonh in a dawtnak le an tthatnak he khahter kan si. Sermi vialte Pathian he naihter dingah le Pathian a tthutnak kha hrawm awkah Pathian nih a kan duh piak mi a si.
(ii) Kannih vialte Pathian sermi kan si caah Pathian sinah upatnak, thang`hatnak, sualngeihthiam halnak, zangfah halnak kha kan tuah a herh. Hi tluk a tthami tuahsernak le a tlingmi biaknak kha Bawi Jesuh he hmunkhat ah i fonh in kannih vialte nih missa raithawinak ah tuah a si.
Pathian nih cun, minung kar le amah kar ah hawikomhnak biakamnak kha lungtho tein a rak tuah cang. Missa raithawinak a sullam cu kannih vialte nih hi biakamnak kha theihter tthan le Pathian nih zumhawk tlakin kan nunnak hnga, thluachuahnak zong a kan pek rih fawn.

(B) MISSA RAITHAWINAK CHUNGAH BAWI KHRIH HE KAN I PEHTLAI.
(i) Bawi Jesuh cu minung sinak le Pathian sinak a lak mi a si. Pa Pathian ngeihchunh Fapa a si ruangah Pathian a si hleiah Ngaknu Thiang Mary nih hrinmi a si caah minung zong a si fawn. Vailam cungah raithawinak a tuahnak thawngin kannih vialte sualnak in khamh kan si. Calvary tlangcung thawinak kha Missa raithawinak ah Khrih nih kanmah vialte caah a kan serpiak.

(ii) Missa chungah, kannih vialte nih Khrih he pumkhat kan sinak hnga le amah a nunning in nun awkah Bawi Khrih a Thi le a Sa kha kan ei i kan ding. Cu ruangah kannih vialte Missa raithawinak thawngin Khrih he kan i pehtlaihnak hi a si.

…….. Kan peh tthan lai……..
Catial tu /- Paceu