Cherubim Vancungmi Zuk

Pathian tuahter mi Milem Zuk

Bawipa le Israel mi nih an tuahmi biakamnak biahren cu a hmunmi Pathian he pehtlai lomi saram, khuachia khuahrum hna milem tuahnak le biaknak kong lawng aa tel i Pathian i khamhnak ca timhtuahnak ah aa telmi Jesuh milem, Bawinu milem, Lamkaltu hna milem, Vancung mi hna milem, mithiang hna milem kernak, upat peknak hna hi an biahren ah aa tel hrimhrim lo. Hi thil hna a cangte lai ti hi Pathian nih a theih chungcang ko nain biakamnak (biahren) ah a rak telh hrimhrim lo. Hawile Khrihfa hna nih Bible kha a parvuan lawng rel in a sullam taktak theih `tung loin an soisel tawn mi cu an palhtuk mi a si. Cu dot ah biakamnak ca lawng a si rih caah “Pathian nih ka mi hna cawnpiak awk ah lungtlap cung i ka `tialmi ka nawlbia hna na kut ah chanh awkah, tlangcung ah rak kai, tiah Moses kha a auh, nisawm li khengte tlangcung ahcun Pathian he bia an i ruah”  (Exo 24:12-18).

Cu tlangcung ahcun Pathian pekmi nawlbia pahra aa `tialnak lungtlap chiahnak caah, “Kei cu nanmah he um awk caah, a thiangmi hmun (puan biakinn) kha ser hna seh. Kan chimh laimi thlam pungsan, `tamhning he aa khat in nan tuah lai, tiin thawhlawm a thawhter hna i amah nih a pekmi biakamnak kha Pathian nih a serter mi biakamnak kuang chungah chiah awkah, a tung donghnih le khapkhat, a vang dongkhat le khapkhat a simi biak`theng zong kha sui in nan ser lai, tiah Pathian nih Moses sinah a chimh mi kha (Exo 25:1-17) ah kan hmuh`han. Hi Bible hi `tha tein rel tuah uh. Nannih  nih Mary zuk le mithiang hna zuk cu chim lo, kha Pathian Fapa zuk le milem tuah kha zeicah nan al? Cu zuk le milem hna cu Jesuh zuk nakin an sang deuh maw? Thlam, biak`theng hna nih mit in hmuhkhawh lomi Pathian a um kha mitthlam ah a cuanter i Pathian kha ruahdamh khawhnak caah muisam an cuanter mi a si.

Cuve bangin Jesuh zuk nih atu hi vawlei ah kan hmuhkhawh ti lomi Khrih Bawipa a umnak kha mit in hmuh i lungthin in hmuhkhawh ding caah muisam a cuanter. Pathian nih “Cherubim pahnih hna milem zong kha na ser lai i biakamnak hngalhter `thantu kuangchin (biak`theng) a dongki pahnih ahkhan pakhat veve na chiah hna lai. Kuangchin kha an ven khawhnak hnga Cherubim nih khan an cunglei veve ah an thla kha an samh veve lai; hmaitonh in an um lai i kuangchin (biak`heng) kha an zoh veve lai. Biakamnak hngalhter `thantu kuangchin (biak`theng) kha a kuang cungah na chiah lai. A chungah cun lungtlap pahnih kan pek lai mi kha na chiah hna lai. Cuka ahcun kan ton lai; Israel mi hna caah ka timi ka nawlbia vialte cu kuangchin cung le kuang cung i a ummi Cherubim pahnih hna karlak cun kan pek tawn lai,” (Exo 25:18-22) tiah Moses kha a ti.

Hi Bible hi kan hawi pawl nih an hmulo maw? Zeicahdah milem an biak tiin Catholic kha an soisel. Fiangte kan chim ahcun, Catholic Biakinn hna nan va kal a si ahcun thla pahnih a ngeimi vancung mi milem nan hmuh lai. Jesuh milem, Nu Mary milem, mithiang hna (Saints) milem an um lai. Hi hna nak in a sang deuh mi Jesuh milem a um lai. Nu Mary milem, vancung mi hna milem, mithiang hna milem zong atu ah kan mit in kan hmu kho ti hna lo nain a rak nung taktak mi, Pathian nih a rak hman mi an si kha kan mit in kan hmuh i an ziaza `tha kha kan lungthin in kan i lak, kan i zohchunh i kan upat hna khawhnak caah a si. Bible kha `tha tein kan rel ahcun Pathian a rak fial mi vancung mi zuk le milem kha an tuah cio i Bible a zul taktak mi hna nih cun Catholic tuah ningkel kha philh hlah uh.

Pathian nih a tuahter mi vancung mi milem tuahnak Bible he, Pathian bia kha nan zul maw? Kannih Catholic pawl cu vancung mi milem tuahnak in Pathian bia kha kan zulh. Catholic pawl nih milem an biak kan ti hna ahcun, Pathian nih zeicahdah Pathian a si lomi vancung mi Cherubim milem tuah a fial kun hna hnga? Na soisel hlan ah Pathian tu kha hal hmasa uh, cun vawlei cung le rili tangah milem tuah hlah, lukun hlah a ti tu Pathian cu budang hmuhnak in a lih a hrawkhroltu cu Pathian a si ko lo maw? 

#Kan pehthan lai>>>>