DAWTNAK RIANTUAN(2)

India ram Kalkatta khua ah Daihnak Nobel laksawng hmumi Sister pakhat a um. A min cu Mother Teresa a si. Nikhat cu thlacamnak tuah awkah khua pakhat ah kal aa thawh. Tlanglawng in kal ding a si. Buda ah zingka tuante ah a phan. Buda zung tlanglawng lampawng hrawng khua a vun zoh tikah mi tampi an rilh liangluang kha a hmuh hna. Hnichia puanchia, rawl`am tihal le zawtfah buin an um ko kha a hmuh hna. A lungchung ah Bawi Jesuh bia "Ka unau hna lak i a hmebik mi pakhat cung i nan tuahmi thil poh hi keimah cungah nan tuah a si," a timi kha a lung ah a hung pem i a caam peng ko. Anmah hna hi ka zohkhenh hna ahcun Bawi Jesuh ka zohkhenh a si ko lai ti kha fiangte in a rak theih. Cucaah mah misifak hna zohkhenh awkah a sister buin chuahnak nawl kha a hal hna.
Tangka piakhat hmanh lo in a chuak i misifak hna zohkhenhnak rian cu a thawk. A chuahni bakah khua chungah a va vak i an chuah cangka in an nu le nih an hlonhmi ngakchia pakul le pakhat kha a char hna. A thaizing ah a chuak `han i a dang pakul kha a char tthan hna. Anmah hna dangh awkah eidin awk le sii hna kha a hal chawm hna. Atu cu Bawi Jesuh kha ka zoh ka khenh taktak cang a ti i a lung aa lawm ngaingai.
Nikhat cu aa chawh lengmang lio ah hmunthur an pumhnak hmun pakhat ah tarnu pakhat a rak rilh ko kha a hmuh. Tarnu cu a zengmi a si i a tho kho lo, a cawl kho lo. Rawlttam tihal le zawtfah bu in a cawl khawhlo caah zu hna nih an ra i an ei; cu bantuk in hngerte zong nih an ei ve. Mother Teresa nih a hmuh tikah "Maw Jesuh" a ti i a thawh, a puak i sii-inn ah a kalpi.
Cu bantuk in a minung hawi cungah dawtnak a ngeih caah amah cu a nun lio hrimhrim ah "A nungmi Mithiang nu" tiah an auh `heu. Mother Teresa cu Khrih cungah a nung i Khrih zong a chungah a nung ve. Cucu a dawtnak rianttuannak ah a lang.
Cucaah Khrih nih a kan pekmi nunnak chung kan nunnak hnga le kan `hannak hnga caah thlacamnak, Sacrament hna hmuhnak le dawtnak rianttuan cu a herh ngaingai. Mah pathum chungah pakhat khat a bau ahcun nunnak ah a thei a tlai kho lai lo. Zeicatiah mah pathum hi pakhat le pakhat an i tlaih dih i an i tthen khawh lo caah a si.

Catial tu/- Rev. Fr. Paul