Mithiang Nicholas

December 6

ST. NICHOLAS (BISHOP) (+350)

Christmas laksawng a phawtzamh tawn mi minthang Santa Claus tiah minih an theihmi St. Nicholas cu kum zabu pathumnak chungah Asia minor i Patara khua ah a chuak. Turkey ram Myra ukchung Bishop sinak in `tuanvo pek a rak si. A si a faktuk caah va a ngei kho lomi a fanu pathum kha a cawm khawh ti hna lo i hlawhhlang `tuanter dingah an nu nih bia a khiahmi kong kha Nicholas nih a theih tikah Sui songkhuai pakhat aa put hnuah muilakah aa phen i a awngmi thlalang awng in inn chungah a hlonhpiak hna. Cu sui songkhuai in a u upabik nu `thitum puai caah a chiah khawh i a upabik nu zong a rauh hlanah va a ngei (`thitumnak puai) a tuah kho. Cu caan karlakah Nicholas cu a pahnihnak le pathumnak fanu hna caah a hlan bantukin sui songkhuai hlonhpiaknak in a rak bawmh ve hna. Ahnubiknak ahcun cuti a tuahmi kha a thlithup in a bihmi a pa nih anmah chungkhar a bawmtu pa cu Nicholas asi kha a theih i a cungah tampi lawmhnak a rak ngei.

Mithianghlim Bishop Nicholas cu 350 kum ah rak thicang ko hmanhseh law mizawn a ruahnak le a siannak lungthin cu a nung pengko i vawleicung ah a min a rakthang. Kum zabu 19 chung Dutch miphun Protestant cheukhat hna cu Bishop pa min kha aa khat tein Santa Claus tiah an rak sak. Amah kha mi nuamthiam, minthang, mi nih an uar ngaimi Christmas laksawng phawtzamhtu a si tiah an rak fehter. A senmi a Angkifual kha Bishop aa khuh mi Docha le angki bantawi ah a rangmi Tuuhmual he `thatein an betpiak. Poland nitlaklei hmun i a ummi Sazuk nganpi hna le Nicholas bu cu mei khutnak tungpar in a `tum i Christmas thingkung karlak hna ah laksawng a thlaipiak tawn hna nakin American ca`tial thiam saya hna kut`tial ah a langkhun i a min a thang ngaingai. Santa Claus cu Christmas thlum alnak taktak a si i vawleicung misifak hna cungah Dawtnak le peksiannak ngeihnak sullam kha a ngeih ter.