THLACAM NUN(1)

Pathian ramkauhnak caah timi a bia tlangpi tangah (1) pekchanhnak nunngeih a biapit ning kha ka hun `ial i, mah he pehtlaih in thlacam nun ngeih biapi a sinak kha a hun pehtthan duhmi a si. Pekchanhnak kong a si ah thlacamnak kong a si ah, Pathian ram kauhnak ca le zumtu khrihfa nun ah santlaihnak a ngeih khawhnak hnga Pathian tu nih thluachuah kan pek piak ko seh.
Pathian a zummi poah nih thlacamnak cu a biapi tuk ti hi kan philh awk a si lo. Zeicatiah thlacamnak nih Thiang Thlarau tthawnnak kha a chuahter, cun Jesuh Khrih umpinak taktak kha kan nunnak ah kan hun hngalh khawh, Pathian biatak hmuhkhawhnak mit a auter, thlacamnak nih kan thilrit kha a zaanter i, sualnak le satan lam hruainak kan tei khawhnak hnga Pathian velngeihnak kha kan hmuh, tilet kha a daihter i, thil sining tampi kha a thlen...
Khrihfa mi hna nih thlacamnak cu kan ngeih ding phunglam pakhat bantuk in kan ruah awk a si lo. Thlacam dingah nawlpek le fialchih kan si, zeicatiah Khrihfa nun ah fek te-in kan dir khawhnak hnga le kan tthan chinchin khawhnak hnga caah a si. (Is 55:6) "Bawipa kha kan naih ah a um caah amah leiah cun i mer u law amah sinah cun thlacam u." ... Bawipa cu na pawng a um lio ah kawl law au tuah u ... thlacamnak hi i pehtlaihnak hri a si i, aw theih in siseh, aw theihlo in siseh, Pathian le zumtu a kan pehtlaih tertu cu a si. (Lk. 18:1) "Lungdongh lo tein thla nan cam zungzal awk a si" tiah Bawi Jesuh nih a kan fial. Khrihfa mi hna nih thlacam kan daithlang mi le zei rel lo in kan um tawnmi hi sual an si, zeicatiah a zungzal in thlacam u tiah fial le nawl pek kan si. (Isamuel 12:23) Samuel nih a chim nan caah thlacam ngol in Bawipa sinah um cu sual a si a ti. St. Paul zong nih thlacam zungzal u tiah a kan fial (Rome 12:12; Efe 6:18).

ZUMHNAK IN THLACAM
Zumhnak in thla kan cam awk a si. Zumhnak nih cun thlacamnak ah a kan hruai. Lung awttawm thlacamnak nih cun thlacam lonak ah a kan hruai, zumhnak nih Pathian kha a taktak a si ter i, lung aw`awmnak nih Pathian tthawnnak le thil tikhawhnak kha a si taktak hngamaw tiah biahalnak a tuah. (Jame 1:6) Thla nan cam tikah lung aw`awm lo tein nan zumh hrimhrim lai. (Mt. 21:22) Nan zumh ah cun thla nan cam tikah nan halmi poh nan hmuh lai. Thlacamnak cu ngakchia nih a duhmi a hal i pek lo awk a tthat lo bantuk khi a si.

LUNGLAWM TEIN THLACAM.
Lunglawm tein thla kan cam awk a si. Kanmah lei sining vialte kha thlak in a Pathian sinnak ah khan i hngatchan khi a si. (Philipi 4:6) Zeithil kong hmanh ah lung rethei in um hlah u, thla nan cam tikah Bawipa cu nan herhmi kha hal u law, lunglawm te-in hal u.
............Kan pehtthan lai......
Catial tu/- Saya Albert Cung Nawl