Nangmah cu Pathian Messiah na si

“Mi nih aho a si an ka ti dah?” tiah a hal hna. “A cheu nih Tipilpetu Johan a si, an in ti. Cun a dang nih, Elijah a si, an in ti. Cun a dang nih hlanlio I a rak ummi profet pakhatkhat kha a nung tthan, an in ti” tiah an ti. Cun annih cu a thawh hna i, “Nannih tah zeitin? Nannih nih tah aho a si nan ka ti dah?” tiah a hal hna. Peter nih a vun leh i, “Nangmah cu Pathian Messiah na si” tiah a ti.(Lk 9:18-22)

Nihin Bawipa nih a zultu hna bia a hal hna tikah a phunphun in an leh; “Elijah, Tipilpetu Johan, hlanlio i a rak ummi profet pakhatkhat kha a nung tthan an in ti” tiin. Tlamtling in bia an let kho lo. An ruahnak le an midang sin in an theih mi lawng a si caah thil hmaan an chim kho lo. Hihi kan zoh tikah biavakvai hi zeitik hmanh ah zumhtlak le thil a dik dih mi an si tawn lo ti hi theih khawh a si.

Zultu hna lei hoih in: “Nannih nih tah aho a si nan ka ti dah?” tiah a hal hna tikah Peter nih: “Nangmah cu Pathian Messiah nan si” tiah biadik le bia hmaan in a leh khawh colh. Zeicah kan ti a si ah cun Peter cu Jesuh(Pathian) he aa naih tein a um zungzal mi a si caah Pathian huham a chungah aa phuang i biadik le bia hmaan a chim khawh colhnak hi a si. Kan nih pakhat cio hna zong Pathian he aa naih tein a um mi kan si ah cun Pathian kan chungin aa phuang ve lai i biadik, biahmaan le thil dik a chim a tuah mi kan si zungzal ko hna lai.

“Nannih nih tah?” timi ah hin pakhat cio kan nunning i check cio ve hna u sih law Bawipa hal mi bia kha let ve hna u sih. “Nangmah nih tah aho a si na ka ti dah?” tiah Bawipa nih kan hal sehlaw zeitin dah kan leh cio hna lai hawidawt.