Hmai lei kong kan hngal dih kho lo

“Mi Fapa hi minung tthawnnak ah chanh a si lai.” Tiah a ti. Sihmanhsehlaw cucu a sullam zeidah a si ti kha an hngal lo. An hngalh nakhnga lo thuhkanh an si i cu kong cu amah hal kha an ngamh fawn lo.(Lk 9:44-45)

Pathian thil ser ning konglam hna hi zoh tikah theih khawh an si hna lo i khuaruahhar thil zong an si. Khuaruahhar an sining ah hin Pathian hrimhrim nih a ttha tiah a ti i thluachuah a pek mi hna zong an si. Thil ttha a si mi paoh hna hi minung hna caah tthatnak le lawmhnak, hnangamnak a pe mi lawng te an si. Hlaan minung hna le Khrihfa a si lo mi mifim hna nih hi bantuk thil khuaruahhar hna hi an zoh hna i “zeizong vialte thil a ti kho tu, sertu a um ko lai” tiah an rak zumh cio ve.

Thil ttha vialte lakah le khuaruahhar vialte lak ah khuaruahhar bik a si mi cu, Jesuh Khrih minung cannak aa lak i a rak kan khamh nak, cun caan dongh tiang in nan sinah ka um lai(Matt 28:20) tiah a ti i a Thisa Sacrament in a kan umpi nak hna hi a si(Matt 26:26-30; Mark 14:22-26; Luke 22:17-20; 1Cor 11:23-25). Hi sining vialte hna hi taksa sining in cun kan thei dih kho hrimhrim hna lo. Zumhnak mit lawngin theih khawh an si.

Thil ttha a um bantukin thil tthalo, tukforh tu le dawnkhaan tu zong a ttha mi hrawh awk ah a um ve timi hi kan theih ding a si. Hi vawlei cungah mi tampi nih covo(rights) kan ngei cio tiah an ti i nunnak lak khawhnak covo lak ding tiangin aa zuam mi le a aupi mi hna zong khat lei ah an um tthan ve. Pathian nih “Lai nan nawng lai lo”(Exo 20:13) tiah a timi ah hin pawchung um mi ngakchia zong an i tel. Lai nawn cu minung thah a si i pawchung a um mi ngakchia hna zong hi minung an si ve caah nau hrawh cu Pathian nawlbia buar a si. Nau hrawhnak phung a buar mi zong tampi an um. Sihmahsehlaw Pathian nih “lai nan nawng lai lo” tiah a timi cu Bupi nih a dirpi zungzal mi a si caah minung nunnak khamh khawh ding ah aa zuam zungzal ve.

Kan Bawipa Jesuh Khrih nih a thih lai nak kong “Mi Fapa hi minung tthawnnak ah chanh a si lai” tiah a ti tikah zultu hna nih a chim duh mi sullam an rak hngal kho lo. “Ka thi lai, an ka thah lai” tiah Bawipa nih zultu hna kha rak ti hna sehlaw zei tin dah an rak si cio hna hnga. Bawipa nih cung kan zeizong vialte a hngalh dih, a theih dih caah lungder in an um lo nak hnga ding caah duhsah tein a rak cawnpiak hna nak hi a si. Thil ttha, khamhnak kan cokhawh nak hnga ding caah temh in nak tuar a herh ko timi kha Bawipa nih a kan cawnpiak duh caah a si. Fahnak kan tuar lai nak siseh, sifah kan tuar lai nak kong siseh, kan thih lai nak kong siseh kan theih cia a si ah cun minung sining in kan um thiam hrimhrim lai lo. Cu caah “An hngalh nakhnga lo thuhkanh an si” tiah a tinak zong hi a si.

Pawngkam ah tukforhtu le hrawh dingin a kan ngiar lengmang tu a um nak kong he pehtlai in mithiang Peter nih: “Fimhring tein um u, ralring tein um u! Nan ral Khuachia cu, seh awk kawl ah, chiandeih bangin a val cuahmah ko. Nan zumhnak ah khan fek tein um u law amah cu rak doh u”(1Pet 5:8-9) tiah a ti.

Cuasicaah a ra lai mi thil, kan theih khawh rih lo mi thil hna cungah ttihphannak lungthin ngeih loin Pathian cungah kan zumhnak fek sehlaw kan ral satan kha do zungzal hna u sih.